Soṇadaṇḍaparivitakko

Author： _System_Pali_VRI_ @ Administrator

Soṇadaṇḍaparivitakko

306. AthaM1.111 kho soṇadaṇḍo brāhmaṇo mahatā brāhmaṇagaṇena saddhiṃ yena gaggarā pokkharaṇī tenupasaṅkami .

Atha kho soṇadaṇḍassa brāhmaṇassa tirovanasaṇḍagatassa evaṃ cetaso parivitakko udapādi –

‘‘ ahañceva kho pana samaṇaṃ gotamaṃ pañhaṃ puccheyyaṃ ;

tatra ce maṃ samaṇo gotamo evaṃ vadeyya –

‘ na kho esa , brāhmaṇa , pañho evaṃ pucchitabbo , evaṃ nāmesa , brāhmaṇaV1.104 , pañho pucchitabbo ’ ti , tena maṃ ayaṃ parisā paribhaveyyaT1.151 –

‘ bālo soṇadaṇḍo brāhmaṇo abyatto , nāsakkhi samaṇaṃ gotamaṃ yoniso pañhaṃ pucchitun ’ ti .

Yaṃ kho panāyaṃ parisā paribhaveyya , yasopi tassa hāyetha .

Yassa kho pana yaso hāyetha , bhogāpi tassa hāyeyyuṃ .

Yasoladdhā kho panamhākaṃ bhogā .

Mamañceva kho pana samaṇo gotamo pañhaṃ puccheyya , tassa cāhaṃ pañhassa veyyākaraṇena cittaṃ na ārādheyyaṃ ;

tatra ce maṃ samaṇo gotamo evaṃ vadeyya –

‘ na kho esa , brāhmaṇa , pañho evaṃ byākātabbo , evaṃ nāmesa , brāhmaṇa , pañho byākātabbo ’ ti , tena maṃ ayaṃ parisā paribhaveyya –

‘ bālo soṇadaṇḍo brāhmaṇo abyatto , nāsakkhiP1.118 samaṇassa gotamassa pañhassa veyyākaraṇena cittaṃ ārādhetun ’ ti .

Yaṃ kho panāyaṃ parisā paribhaveyya , yasopi tassa hāyetha .

Yassa kho pana yaso hāyetha , bhogāpi tassa hāyeyyuṃ .

Yasoladdhā kho panamhākaṃ bhogā .

Ahañceva kho pana evaṃ samīpagato samāno adisvāva samaṇaṃ gotamaṃ nivatteyyaṃ , tena maṃ ayaṃ parisā paribhaveyya –

‘ bālo soṇadaṇḍo brāhmaṇo abyatto mānathaddho bhīto ca , no visahati samaṇaṃ gotamaṃ dassanāya upasaṅkamituṃ , kathañhi nāma evaṃ samīpagato samāno adisvā samaṇaṃ gotamaṃ nivattissatī ’ ti .

Yaṃ kho panāyaṃ parisā paribhaveyya , yasopi tassa hāyetha .

Yassa kho pana yaso hāyetha , bhogāpi tassa hāyeyyuṃ , yasoladdhā kho panamhākaṃ bhogā ’’ ti .

307. Atha kho soṇadaṇḍo brāhmaṇo yena bhagavā tenupasaṅkami ;

upasaṅkamitvā bhagavatā saddhiṃ sammodi .

Sammodanīyaṃ kathaṃ sāraṇīyaṃ vītisāretvā ekamantaṃ nisīdi .

Campeyyakāpi kho brāhmaṇagahapatikāM1.112 appekacce bhagavantaṃ abhivādetvā ekamantaṃ nisīdiṃsu ;

appekacce bhagavatā saddhiṃ sammodiṃsu ;

sammodanīyaṃ kathaṃ sāraṇīyaṃ vītisāretvā ekamantaṃ nisīdiṃsu ;

appekacce yena bhagavā tenañjaliṃ paṇāmetvā ekamantaṃ nisīdiṃsu ;

appekacce nāmagottaṃ sāvetvā ekamantaṃ nisīdiṃsu ;

appekacce tuṇhībhūtā ekamantaṃ nisīdiṃsu .

308. TatrapiP1.119 sudaṃ soṇadaṇḍo brāhmaṇo etadeva bahulamanuvitakkento nisinno hoti –

‘‘ ahañceva khoT1.152 pana samaṇaṃ gotamaṃ pañhaṃ puccheyyaṃ ;

tatra ce maṃ samaṇo gotamo evaṃ vadeyya –

‘ na kho esa , brāhmaṇa , pañho evaṃ pucchitabbo , evaṃ nāmesa , brāhmaṇa , pañho pucchitabbo ’ ti , tena maṃ ayaṃ parisā paribhaveyya –

‘ bālo soṇadaṇḍo brāhmaṇo abyatto , nāsakkhi samaṇaṃ gotamaṃ yoniso pañhaṃ pucchitun ’ ti .

Yaṃ kho panāyaṃ parisā paribhaveyya , yasopi tassa hāyetha .

Yassa kho pana yaso hāyetha , bhogāpi tassa hāyeyyuṃ .

Yasoladdhā kho panamhākaṃ bhogā .

Mamañceva kho pana samaṇo gotamo pañhaṃ puccheyya , tassa cāhaṃ pañhassa veyyākaraṇenaV1.105 cittaṃ na ārādheyyaṃ ;

tatra ce maṃ samaṇo gotamo evaṃ vadeyya –

‘ na kho esa , brāhmaṇa , pañho evaṃ byākātabbo , evaṃ nāmesa , brāhmaṇa , pañho byākātabbo ’ ti , tena maṃ ayaṃ parisā paribhaveyya –

‘ bālo soṇadaṇḍo brāhmaṇo abyatto , nāsakkhi samaṇassa gotamassa pañhassa veyyākaraṇena cittaṃ ārādhetun ’ ti .

Yaṃ kho panāyaṃ parisā paribhaveyya , yasopi tassa hāyetha .

Yassa kho pana yaso hāyetha , bhogāpi tassa hāyeyyuṃ .

Yasoladdhā kho panamhākaṃ bhogā .

Aho vata maṃ samaṇo gotamo sake ācariyake tevijjake pañhaṃ puccheyya , addhā vatassāhaṃ cittaṃ ārādheyyaṃ pañhassa veyyākaraṇenā ’’ ti .

Issues

Select Version

Sīlakkhandhavaggapāḷi

Sīlakkhandhavaggapāḷi