Tīradassisakuṇupamā
497.‘‘ Evaṃ vutte , ahaṃ , kevaṭṭa , taṃ bhikkhuṃ etadavocaṃ –
‘ bhūtapubbaṃ , bhikkhu , sāmuddikā vāṇijā tīradassiṃ sakuṇaṃ gahetvā nāvāya samuddaṃ ajjhogāhanti .
Te atīradakkhiniyā nāvāya tīradassiṃ sakuṇaṃ muñcanti .
So gacchateva puratthimaṃ disaṃ , gacchati dakkhiṇaṃ disaṃ , gacchati pacchimaṃ disaṃ , gacchati uttaraṃ disaṃ , gacchati uddhaṃ disaṃ , gacchati anudisaṃ .
Sace so samantā tīraṃ
M1.213 passati , tathāgatakova [ tathāpakkantova ( syā .)] hoti .Sace pana so samantā tīraṃ na passati , tameva nāvaṃ paccāgacchati .
Evameva kho tvaṃ , bhikkhu , yato yāva brahmalokā
P1.223 pariyesamāno imassa pañhassaT1.283 veyyākaraṇaṃ nājjhagā , atha mamaññeva santike paccāgato .Na kho eso , bhikkhu , pañho evaṃ pucchitabbo –
‘ kattha nu kho , bhante , ime cattāro mahābhūtā aparisesā nirujjhanti , seyyathidaṃ – pathavīdhātu āpodhātu tejodhātu vāyodhātū ’ ti ?
498.‘‘ Evañca kho eso , bhikkhu , pañho pucchitabbo –
‘ Kattha āpo ca pathavī , tejo vāyo na gādhati ;
Kattha dīghañca rassañca , aṇuṃ thūlaṃ subhāsubhaṃ ;
Kattha nāmañca rūpañca , asesaṃ uparujjhatī ’ ti .
499.‘‘ Tatra veyyākaraṇaṃ bhavati –
‘ Viññāṇaṃ anidassanaṃ , anantaṃ sabbatopabhaṃ ;
Ettha āpo ca pathavī , tejo vāyo na gādhati .
Ettha dīghañca rassañca , aṇuṃ thūlaṃ subhāsubhaṃ ;
Ettha nāmañca rūpañca , asesaṃ uparujjhati ;
Viññāṇassa nirodhena , etthetaṃ uparujjhatī ’ ti .
500. Idamavoca
V1.204 bhagavā .Attamano kevaṭṭo gahapatiputto bhagavato bhāsitaṃ abhinandīti .
Kevaṭṭasuttaṃ niṭṭhitaṃ ekādasamaṃ .