Dasa ākārā
343.‘‘ Atha kho , brāhmaṇa , purohito brāhmaṇo rañño mahāvijitassa pubbeva yaññā dasahākārehi paṭiggāhakesu vippaṭisāraṃ paṭivinesi .
‘ Āgamissanti kho bhoto yaññaṃ pāṇātipātinopi pāṇātipātā paṭiviratāpi .
Ye tattha pāṇātipātino , tesaññeva tena .
Ye tattha pāṇātipātā paṭiviratā , te ārabbha yajataṃ bhavaṃ , sajjataṃ bhavaṃ , modataṃ bhavaṃ , cittameva bhavaṃ antaraṃ pasādetu .
Āgamissanti kho bhoto yaññaṃ adinnādāyinopi adinnādānā paṭiviratāpi … pe …
T1.177 kāmesu micchācārinopi kāmesumicchācārā paṭiviratāpi … musāvādinopi musāvādā paṭiviratāpi … pisuṇavācinopi pisuṇāya vācāya paṭiviratāpi … pharusavācinopi pharusāya vācāya paṭiviratāpi … samphappalāpinopi samphappalāpāM1.132 paṭiviratāpiP1.139 … abhijjhālunopi anabhijjhālunopi … byāpannacittāpi abyāpannacittāpi … micchādiṭṭhikāpi sammādiṭṭhikāpi ….Ye tattha micchādiṭṭhikā , tesaññeva tena .
Ye tattha sammādiṭṭhikā , te ārabbha yajataṃ bhavaṃ , sajjataṃ bhavaṃ , modataṃ bhavaṃ , cittameva bhavaṃ antaraṃ pasādetū ’ ti .
Imehi kho , brāhmaṇa , purohito brāhmaṇo rañño mahāvijitassa pubbeva yaññā dasahākārehi paṭiggāhakesu vippaṭisāraṃ paṭivinesi .