Pubbakaisibhāvānuyogo
283.‘‘ Brāhmaṇo
M1.97 kho pana , ambaṭṭha , pokkharasāti rañño pasenadissa kosalassa dattikaṃ bhuñjati .Tassa rājā pasenadi kosalo sammukhībhāvampi na dadāti .
Yadāpi tena manteti , tirodussantena manteti .
Yassa kho pana , ambaṭṭha , dhammikaṃ payātaṃ bhikkhaṃ paṭiggaṇheyya , kathaṃ tassa rājā pasenadi kosalo sammukhībhāvampi na dadeyya .
Passa , ambaṭṭha , yāva aparaddhañca te idaṃ ācariyassa brāhmaṇassa pokkharasātissa .
284.‘‘ Taṃ kiṃ maññasi , ambaṭṭha , idha rājā pasenadi kosalo hatthigīvāya vā nisinno assapiṭṭhe vā nisinno rathūpatthare vā ṭhito uggehi vā rājaññehi vā kiñcideva mantanaṃ
P1.104 manteyya .So tamhā padesā apakkamma ekamantaṃ tiṭṭheyya .
Atha āgaccheyya suddo vā
V1.91 suddadāso vā , tasmiṃ padese ṭhito tadeva mantanaṃ manteyya –‘ evampi rājā pasenadi kosalo āha , evampi rājā pasenadi kosalo āhā ’ ti .
Apinu so rājabhaṇitaṃ vā bhaṇati rājamantanaṃ vā manteti ?
Ettāvatā so
T1.134 assa rājā vā rājamatto vā ’’ ti ?‘‘ No hidaṃ , bho gotama ’’.
285.‘‘ Evameva kho tvaṃ , ambaṭṭha , ye te ahesuṃ brāhmaṇānaṃ pubbakā isayo mantānaṃ kattāro mantānaṃ pavattāro , yesamidaṃ etarahi brāhmaṇā porāṇaṃ mantapadaṃ gītaṃ pavuttaṃ samihitaṃ , tadanugāyanti tadanubhāsanti bhāsitamanubhāsanti vācitamanuvācenti , seyyathidaṃ – aṭṭhako vāmako vāmadevo vessāmitto yamataggi [ yamadaggi ( ka .)] aṅgīraso bhāradvājo vāseṭṭho kassapo bhagu –
‘ tyāhaṃ mante adhiyāmi sācariyako ’ ti , tāvatā tvaṃ bhavissasi isi vā isitthāya vā paṭipannoti netaṃ ṭhānaṃ vijjati .
286.‘‘ Taṃ kiṃ maññasi , ambaṭṭha , kinti te sutaṃ brāhmaṇānaṃ vuddhānaṃ mahallakānaṃ ācariyapācariyānaṃ bhāsamānānaṃ – ye te ahesuṃ brāhmaṇānaṃ pubbakā isayo mantānaṃ kattāro mantānaṃ pavattāro , yesamidaṃ
M1.98 etarahi brāhmaṇā porāṇaṃ mantapadaṃ gītaṃ pavuttaṃ samihitaṃ , tadanugāyanti tadanubhāsanti bhāsitamanubhāsanti vācitamanuvācenti , seyyathidaṃ – aṭṭhako vāmako vāmadevo vessāmitto yamataggi aṅgīraso bhāradvājo vāseṭṭho kassapo bhagu , evaṃ su te sunhātā suvilittā kappitakesamassū āmukkamaṇikuṇḍalābharaṇā [ āmuttamālābharaṇā ( sī . syā . pī .)] odātavatthavasanā pañcahi kāmaguṇehi samappitā samaṅgībhūtā paricārenti , seyyathāpi tvaṃ etarahi sācariyako ’’ ti ?‘‘ No
P1.105 hidaṃ , bho gotama ’’.‘‘… Pe … evaṃ su te sālīnaṃ odanaṃ sucimaṃsūpasecanaṃ vicitakāḷakaṃ anekasūpaṃ anekabyañjanaṃ paribhuñjanti , seyyathāpi tvaṃ etarahi sācariyako ’’ ti
T1.135 ?‘‘ No hidaṃ , bho gotama ’’.
‘‘… Pe … evaṃ su te veṭhakanatapassāhi nārīhi paricārenti , seyyathāpi tvaṃ etarahi sācariyako ’’ ti ?
‘‘ No hidaṃ , bho gotama ’’.
‘‘… Pe … evaṃ su te kuttavālehi vaḷavārathehi dīghāhi patodalaṭṭhīhi vāhane vitudentā
V1.92 vipariyāyanti , seyyathāpi tvaṃ etarahi sācariyako ’’ ti ?‘‘ No hidaṃ , bho gotama ’’.
‘‘… Pe … evaṃ su te ukkiṇṇaparikhāsu okkhittapalighāsu nagarūpakārikāsu dīghāsivudhehi [ dīghāsibaddhehi ( syā . pī .)] purisehi rakkhāpenti , seyyathāpi tvaṃ etarahi sācariyako ’’ ti ?
‘‘ No hidaṃ , bho gotama ’’.
‘‘ Iti kho , ambaṭṭha , neva tvaṃ isi na isitthāya paṭipanno sācariyako .
Yassa kho pana , ambaṭṭha , mayi kaṅkhā vā vimati vā so maṃ pañhena , ahaṃ veyyākaraṇena sodhissāmī ’’ ti .