Dibbasotañāṇaṃ
240.‘‘ So
V1.70 evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte dibbāya sotadhātuyā cittaṃ abhinīharati abhininnāmeti .So dibbāya sotadhātuyā visuddhāya atikkantamānusikāya ubho sadde suṇāti dibbe ca mānuse ca ye dūre santike ca .
241.‘‘ Seyyathāpi
M1.75 , mahārāja , puriso addhānamaggappaṭipanno .So suṇeyya bherisaddampi mudiṅgasaddampi [ mutiṅgasaddampi ( sī . pī .)] saṅkhapaṇavadindimasaddampi [ saṅkhapaṇavadeṇḍimasaddampi ( sī . pī .), saṅkhasaddaṃpi paṇavasaddaṃpi dendimasaddaṃpi ( syā . kaṃ .)].
Tassa evamassa –
‘ bherisaddo ’ itipi ,‘ mudiṅgasaddo ’ itipi ,‘ saṅkhapaṇavadindimasaddo ’ itipi [ saṅkhasaddo itipi paṇavasaddo itipi dendimasaddo itipi ( syā . kaṃ .)].
Evameva kho , mahārāja , bhikkhu evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte dibbāya sotadhātuyā
T1.105 cittaṃ abhinīharati abhininnāmeti .So dibbāya sotadhātuyā visuddhāya atikkantamānusikāya ubho sadde suṇāti dibbe ca mānuse ca ye dūre santike ca .
Idampi kho , mahārāja , sandiṭṭhikaṃ sāmaññaphalaṃ purimehi sandiṭṭhikehi sāmaññaphalehi abhikkantatarañca paṇītatarañca .