Khāṇumatakabrāhmaṇagahapatikā

ຜູ້ຂຽນ： _System_Pali_VRI_ @ Administrator

Khāṇumatakabrāhmaṇagahapatikā

323. EvaṃM1.120V1.112P1.127T1.162 me sutaṃ – ekaṃ samayaṃ bhagavā magadhesu cārikaṃ caramāno mahatā bhikkhusaṅghena saddhiṃ pañcamattehi bhikkhusatehi yena khāṇumataṃ nāma magadhānaṃ brāhmaṇagāmo tadavasari .

Tatra sudaṃ bhagavā khāṇumate viharati ambalaṭṭhikāyaṃ .

Tena kho pana samayena kūṭadanto brāhmaṇo khāṇumataṃ ajjhāvasati sattussadaṃ satiṇakaṭṭhodakaṃ sadhaññaṃ rājabhoggaṃ raññā māgadhena seniyena bimbisārena dinnaṃ rājadāyaṃ brahmadeyyaṃ .

Tena kho pana samayena kūṭadantassa brāhmaṇassa mahāyañño upakkhaṭo hoti .

Satta ca usabhasatāni satta ca vacchatarasatāni satta ca vacchatarīsatāni satta ca ajasatāni satta ca urabbhasatāni thūṇūpanītāni honti yaññatthāya .

324. Assosuṃ kho khāṇumatakā brāhmaṇagahapatikā –

‘‘ samaṇo khalu , bho , gotamo sakyaputto sakyakulā pabbajito magadhesu cārikaṃ caramāno mahatā bhikkhusaṅghena saddhiṃ pañcamattehi bhikkhusatehi khāṇumataṃ anuppatto khāṇumate viharati ambalaṭṭhikāyaṃ .

Taṃ kho pana bhavantaṃ gotamaṃ evaṃ kalyāṇo kittisaddo abbhuggato –

‘ itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavā ’ tiP1.128 .

So imaṃ lokaṃ sadevakaṃ samārakaṃT1.163 sabrahmakaṃ sassamaṇabrāhmaṇiṃ pajaṃ sadevamanussaṃ sayaṃ abhiññā sacchikatvā pavedeti .

So dhammaṃ deseti ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ pakāseti .

Sādhu kho pana tathārūpānaṃ arahataṃ dassanaṃ hotī ’’ ti .

325. AthaV1.113 kho khāṇumatakā brāhmaṇagahapatikā khāṇumatā nikkhamitvā saṅghasaṅghī gaṇībhūtā yena ambalaṭṭhikā tenupasaṅkamanti .

326. TenaM1.121 kho pana samayena kūṭadanto brāhmaṇo uparipāsāde divāseyyaṃ upagato hoti .

Addasā kho kūṭadanto brāhmaṇo khāṇumatake brāhmaṇagahapatike khāṇumatā nikkhamitvā saṅghasaṅghī gaṇībhūte yena ambalaṭṭhikā tenupasaṅkamante .

Disvā khattaṃ āmantesi –

‘‘ kiṃ nu kho , bho khatte , khāṇumatakā brāhmaṇagahapatikā khāṇumatā nikkhamitvā saṅghasaṅghī gaṇībhūtā yena ambalaṭṭhikā tenupasaṅkamantī ’’ ti ?

327.‘‘ Atthi kho , bho , samaṇo gotamo sakyaputto sakyakulā pabbajito magadhesu cārikaṃ caramāno mahatā bhikkhusaṅghena saddhiṃ pañcamattehi bhikkhusatehi khāṇumataṃ anuppatto , khāṇumate viharati ambalaṭṭhikāyaṃ .

Taṃ kho pana bhavantaṃ gotamaṃ evaṃ kalyāṇo kittisaddo abbhuggato –

‘ itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavā ’ ti .

Tamete bhavantaṃ gotamaṃ dassanāya upasaṅkamantī ’’ ti .

328. Atha kho kūṭadantassa brāhmaṇassa etadahosi –

‘‘ sutaṃ kho pana metaṃ –

‘ samaṇoT1.164 gotamo tividhaṃ yaññasampadaṃ soḷasaparikkhāraṃ jānātī ’ ti .

Na kho panāhaṃ jānāmi tividhaṃ yaññasampadaṃ soḷasaparikkhāraṃ .

Icchāmi cāhaṃ mahāyaññaṃ yajituṃ .

YaṃnūnāhaṃP1.129 samaṇaṃ gotamaṃ upasaṅkamitvā tividhaṃ yaññasampadaṃ soḷasaparikkhāraṃ puccheyyan ’’ ti .

329. Atha kho kūṭadanto brāhmaṇo khattaṃ āmantesi –

‘‘ tena hi , bho khatte , yena khāṇumatakā brāhmaṇagahapatikā tenupasaṅkama .

Upasaṅkamitvā khāṇumatake brāhmaṇagahapatike evaṃ vadehi –

‘ kūṭadanto , bho , brāhmaṇo evamāha –

‘‘ āgamentu kira bhavanto , kūṭadantopi brāhmaṇo samaṇaṃ gotamaṃ dassanāya upasaṅkamissatī ’’’ ti .

‘‘ Evaṃ , bho ’’ ti kho so khattā kūṭadantassa brāhmaṇassa paṭissutvā yena khāṇumatakā brāhmaṇagahapatikā tenupasaṅkami .

Upasaṅkamitvā khāṇumatake brāhmaṇagahapatike etadavoca –

‘‘ kūṭadanto , bho , brāhmaṇo evamāha –

‘ āgamentu kira bhonto , kūṭadantopi brāhmaṇo samaṇaṃ gotamaṃ dassanāya upasaṅkamissatī ’’’ ti .

Issues

ເລືອກເວີຊັນ

Sīlakkhandhavaggapāḷi

Sīlakkhandhavaggapāḷi