14. Gandhatthenasuttavaṇṇanā
234. Cuddasame
M1.272 ajjhabhāsīti taṃ bhikkhuṃ nāḷe gahetvā padumaṃ siṅghamānaṃ disvāva –‘‘ ayaṃ bhikkhu satthu santike kammaṭṭhānaṃ gahetvā samaṇadhammaṃ kātuṃ araññaṃ
P1.298 paviṭṭho gandhārammaṇaṃ upanijjhāyati , svāyaṃ ajja upasiṅghaṃ svepi punadivasepi upasiṅghissati , evamassa sā gandhataṇhā vaḍḍhitvā diṭṭhadhammikasamparāyikaṃ atthaṃ nāsessati , mā mayi passantiyā nassatu , codessāmi nan ’’ ti upasaṅkamitvā abhāsi .Ekaṅgametaṃ
V1.262 theyyānan ti thenitabbānaṃ rūpārammaṇādīnaṃ pañcakoṭṭhāsānaṃ idaṃ ekaṅgaṃ , ekakoṭṭhāsoti attho .Na harāmīti na gahetvā gacchāmi .
Ārāti dūre nāḷe gahetvā nāmetvā dūre ṭhito upasiṅghāmīti vadati .
Vaṇṇenāti kāraṇena .
Yvāyan ti yo ayaṃ .
Tasmiṃ kira devatāya saddhiṃ kathenteyeva eko tāpaso otaritvā bhisakhananādīni kātuṃ āraddho , taṃ sandhāyevamāha .
Ākiṇṇakammantoti evaṃ aparisuddhakammanto .
Akhīṇakammantotipi pāṭho , kakkhaḷakammantoti attho .
Na vuccatīti gandhacoroti vā pupphacoroti vā kasmā na vuccati .
Ākiṇṇaluddoti bahupāpo gāḷhapāpo vā , tasmā na vuccati .
Dhāticelaṃva makkhitoti yathā dhātiyā nivatthakiliṭṭhavatthaṃ uccārapassāvapaṃsumasikaddamādīhi makkhitaṃ , evamevaṃ rāgadosādīhi makkhito .
Arahāmi vattaveti arahāmi vattuṃ .
Devatāya codanā kira sugatānusiṭṭhisadisā , na taṃ lāmakā hīnādhimuttikā micchāpaṭipannakapuggalā labhanti .
Tasmiṃ pana attabhāve maggaphalānaṃ bhabbarūpā puggalā taṃ labhanti , tasmā evamāha .
Sucigavesinoti sucīni sīlasamādhiñāṇāni gavesantassa .
Abbhāmattaṃ vāti valāhakakūṭamattaṃ viya .
Jānāsīti suddho ayanti jānāsi .
Vajjāsīti vadeyyāsi .
Neva taṃ upajīvāmāti devatā kira cintesi –
‘‘ ayaṃ bhikkhu atthi me hitakāmā devatā , sā maṃ codessati sāressatīti
M1.273 pamādampi anuyuñjeyya , nāssaP1.299 vacanaṃ sampaṭicchissāmī ’’ ti .Tasmā evamāha .
Tvamevāti tvaṃyeva .
Jāneyyāti jāneyyāsi .
Yenāti yena kammena sugatiṃ gaccheyyāsi , taṃ kammaṃ tvaṃyeva jāneyyāsīti .
Cuddasamaṃ .
Iti sāratthappakāsiniyā
Saṃyuttanikāya-aṭṭhakathāya
Vanasaṃyuttavaṇṇanā niṭṭhitā .