6. Niddātandīsuttavaṇṇanā
16. Chaṭṭhe niddāti ,‘‘ abhijānāmahaṃ , aggivessana , gimhānaṃ pacchime māse niddaṃ okkamitā ’’ ti ( ma . ni .1.387) evarūpāya abyākataniddāya pubbabhāgāparabhāgesu sekhaputhujjanānaṃ sasaṅkhārikaakusale citte uppannaṃ thinamiddhaṃ .
Tandīti aticchātātisītādikālesu uppannaṃ āgantukaṃ ālasiyaṃ .
Vuttampi cetaṃ –
‘‘ tattha katamā tandī ?
Yā tandī tandiyanā tandimanatā ālasyaṃ ālasyāyanā ālasyāyitattaṃ , ayaṃ vuccati tandī ’’ ti ( vibha .857).
Vijambhitāti kāyavijambhanā .
Aratīti akusalapakkhā ukkaṇṭhitatā .
Bhattasammadoti bhattamucchā bhattakilamatho .
Vitthāro pana tesaṃ –
‘‘ tattha katamā
P1.36 vijambhitā ?Yā kāyassa jambhanā vijambhanā ’’ tiādinā nayena abhidhamme āgatova .
Etenāti etena niddādinā upakkilesena upakkiliṭṭho nivāritapātubhāvo .
Nappakāsatīti na jotati , na pātubhavatīti attho .
Ariyamaggoti lokuttaramaggo .
Idhāti imasmiṃ loke .
Pāṇinan ti sattānaṃ .
Vīriyenāti maggasahajātavīriyena .
Naṃ paṇāmetvāti etaṃ kilesajātaṃ nīharitvā .
Ariyamaggoti lokiyalokuttaramaggo .
Iti maggeneva upakkilese nīharitvā maggassa visuddhi vuttāti .
Niddātandīsuttavaṇṇanā niṭṭhitā .