(4.) Catukkaniddesavaṇṇanā
939. Itīti nidassane nipātoti evaṃ-saddena samānatthoti dasseti .
Bhavābhavahetūtipīti ettha bhavanti jāyanti etenāti bhavo , sappiādibhesajjaṃ .
Bhavo eva paṇītataro abhivuddho abhavo .
Bhāvanārāmatāariyavaṃsappaheyyattā vā purimataṇhāttayavajjā sabbā taṇhā ‘‘ bhavābhavahetu uppajjatī ’’ ti vuttāti veditabbā .
Etāyāti
M0.225 chandādiagatiyā .Na gacchantīti na pavattanti , taṃ taṃ kiriyaṃ na karontīti
V0.227 attho .Imināti chandādinā agatigamanena .
Chandādīsu yena ninno , tena gamanaṃ yathāninnagamanaṃ .
‘‘ Rājā ’’ tiādinā rājādinimitto viya ūmiādinimitto cittutrāso ūmiādibhayaṃ ,‘‘ ūmibhayanti kho , bhikkhave , kodhupāyāsassetaṃ adhivacanan ’’ tiādivacanato ( ma . ni .2.162; a . ni .4.122; itivu .109) kodhupāyāsaodarikattapañcakāmaguṇamātugāmā vā .
Tattha pañcakāmaguṇamātugāmaggahaṇena tannissitachandarāgaggahaṇaṃ veditabbaṃ , odarikattañca lobhova .
Ukkhepanīyādikammaṃ vinayadaṇḍaṃ .
‘‘ Atha kho timbaruko paribbājako yena bhagavā … pe … etadavoca ‘ kiṃ nu kho , bho gotama , sayaṃkataṃ sukhadukkhan ’ ti ?
Mā hevaṃ timbarukāti bhagavā avocā ’’ tiādinā nidānavagge ( saṃ . ni .2.18) āgatattā ‘‘ timbarukadiṭṭhī ’’ ti vuttā .
Catukkaniddesavaṇṇanā niṭṭhitā .