3. Kalyāṇavaggo
171. Kalyāṇadhammajātakaṃ (2-3-1)
41.
Kalyāṇadhammoti
T1.60V1.40 yadā janinda , loke samaññaṃ anupāpuṇāti ;Tasmā na hiyyetha [ hīyetha ( sī .)] naro sapañño , hiriyāpi santo dhuramādiyanti .
42.
Sāyaṃ samaññā idha majja pattā , kalyāṇadhammoti janinda loke ;
Tāhaṃ samekkhaṃ idha pabbajissaṃ , na hi matthi chando idha kāmabhogeti .
Kalyāṇadhammajātakaṃ paṭhamaṃ .
172. Daddarajātakaṃ (2-3-2)
43.
Ko nu saddena mahatā , abhinādeti daddaraṃ ;
Taṃ sīhā nappaṭinadanti [ kiṃ sīhā nappaṭinadanti ( sī . pī .), na sīhā paṭinadanti ( ka .)], ko nāmeso migādhibhū .
44.
Adhamo migajātānaṃ , siṅgālo tāta vassati ;
Jātimassa jigucchantā , tuṇhī sīhā samacchareti .
Daddarajātakaṃ dutiyaṃ .
173. Makkaṭajātakaṃ (2-3-3)
45.
Tāta
T1.61M1.44 māṇavako eso , tālamūlaṃ apassito ;Agārakañcidaṃ atthi , handa demassagārakaṃ .
46.
Mā kho tvaṃ tāta pakkosi , dūseyya no agārakaṃ ;
Netādisaṃ mukhaṃ hoti , brāhmaṇassa susīlinoti .
Makkaṭajātakaṃ tatiyaṃ .
174. Dubbhiyamakkaṭajātakaṃ (2-3-4)
47.
Adamha te vāri pahūtarūpaṃ , ghammābhitattassa pipāsitassa ;
So dāni pitvāna [ pītvāna ( sī . pī .)] kiriṅkarosi [ kikiṃkarosi ( sī . syā . pī .)], asaṅgamo pāpajanena seyyo .
48.
Ko te suto vā diṭṭho vā , sīlavā nāma makkaṭo ;
Idāni kho taṃ ohacchaṃ [ ūhacca ( sī . pī .), ohaccaṃ ( syā .), uhajjaṃ ( ka .)], esā asmāka dhammatāti .
Dubbhiyamakkaṭajātakaṃ catutthaṃ .
175. Ādiccupaṭṭhānajātakaṃ (2-3-5)
49.
Sabbesu
V1.41 kira bhūtesu , santi sīlasamāhitā ;Passa sākhāmigaṃ jammaṃ , ādiccamupatiṭṭhati .
50.
Nāssa sīlaṃ vijānātha , anaññāya pasaṃsatha ;
Aggihuttañca
T1.62 uhannaṃ [ ūhantaṃ ( sī .), ūhanaṃ ( syā .), ūhanti ( pī .), uhadaṃ ( ka .)], dve ca bhinnā kamaṇḍalūti .Ādiccupaṭṭhānajātakaṃ pañcamaṃ .
176. Kaḷāyamuṭṭhijātakaṃ (2-3-6)
51.
Bālo
M1.45 vatāyaṃ dumasākhagocaro , paññā janinda nayimassa vijjati ;Kaḷāyamuṭṭhiṃ [ kalāyamuṭṭhiṃ ( sī . pī .)] avakiriya kevalaṃ , ekaṃ kaḷāyaṃ patitaṃ gavesati .
52.
Evameva mayaṃ rāja , ye caññe atilobhino ;
Appena bahuṃ jiyyāma , kaḷāyeneva vānaroti .
Kaḷāyamuṭṭhijātakaṃ chaṭṭhaṃ .
177. Tindukajātakaṃ (2-3-7)
53.
Dhanuhatthakalāpehi , nettiṃ savaradhāribhi ;
Samantā parikiṇṇamha , kathaṃ mokkho bhavissati .
54.
Appeva bahukiccānaṃ , attho jāyetha koci naṃ ;
Atthi rukkhassa acchinnaṃ , khajjathaññeva tindukanti .
Tindukajātakaṃ sattamaṃ .
178. Kacchapajātakaṃ (2-3-8)
55.
Janittaṃ
T1.63 me bhavittaṃ me , iti paṅke avassayiṃ ;Taṃ maṃ paṅko ajjhabhavi , yathā dubbalakaṃ tathā ;
Taṃ taṃ vadāmi bhaggava , suṇohi vacanaṃ mama .
56.
Gāme vā yadi vā raññe , sukhaṃ yatrādhigacchati ;
Taṃ janittaṃ bhavittañca , purisassa pajānato ;
Yamhi jīve tamhi gacche , na niketahato siyāti .
Kacchapajātakaṃ aṭṭhamaṃ .
179. Satadhammajātakaṃ (2-3-9)
57.
Tañca
V1.42 appañca ucchiṭṭhaṃ , tañca kicchena no adā ;Sohaṃ brāhmaṇajātiko , yaṃ bhuttaṃ tampi uggataṃ .
58.
Evaṃ
M1.46 dhammaṃ niraṃkatvā [ nirākatvā (?) ni + ā + kara + tvā ], yo adhammena jīvati ;Satadhammova lābhena , laddhenapi na nandatīti .
Satadhammajātakaṃ navamaṃ .
180. Duddadajātakaṃ (2-3-10)
59.
Duddadaṃ dadamānānaṃ , dukkaraṃ kamma kubbataṃ ;
Asanto nānukubbanti , sataṃ dhammo durannayo .
60.
Tasmā satañca asataṃ , nānā hoti ito gati ;
Asanto
T1.64 nirayaṃ yanti , santo saggaparāyaṇāti [ parāyanā ( syā . ka .)].Duddadajātakaṃ dasamaṃ .
Kalyāṇavaggo tatiyo .
Tassuddānaṃ –
Susamaññamigādhibhū māṇavako , vāripahūtarūpādiccupaṭṭhānā ;
Sakaḷāyasatindukapaṅka puna , satadhamma sududdadakena dasāti .