480. Akittijātakaṃ (7)
83.
Akittiṃ [ akattiṃ ( ka .)] disvā sammantaṃ , sakko bhūtapatī bravi ;
Kiṃ patthayaṃ mahābrahme , eko sammasi ghammani .
84.
Dukkho punabbhavo sakka , sarīrassa ca bhedanaṃ ;
Sammohamaraṇaṃ dukkhaṃ , tasmā sammāmi vāsava .
85.
Etasmiṃ te sulapite , patirūpe subhāsite ;
Varaṃ kassapa te dammi , yaṃ kiñci manasicchasi .
86.
Varaṃ ce me ado sakka , sabbabhūtānamissara ;
Yena putte ca dāre ca , dhanadhaññaṃ piyāni ca ;
Laddhā narā na [ laddhā naññāni ( ka .)] tappanti , so lobho na mayī vase .
87.
Etasmiṃ
V1.206 te sulapite , patirūpe subhāsite ;Varaṃ
T1.355 kassapa te dammi , yaṃ kiñci manasicchasi . 88.
Varaṃ ce me ado sakka , sabbabhūtānamissara ;
Khettaṃ vatthuṃ hiraññañca , gavassaṃ dāsaporisaṃ ;
Yena jātena jīyanti , so doso na mayī vase .
89.
Etasmiṃ te sulapite , patirūpe subhāsite ;
Varaṃ kassapa te dammi , yaṃ kiñci manasicchasi .
90.
Varaṃ
M1.267 ce me ado sakka , sabbabhūtānamissara ;Bālaṃ na passe na suṇe , na ca bālena saṃvase ;
Bālenallāpa [ bālenā ’ lāpa (?)] sallāpaṃ , na kare na ca rocaye .
91.
Kiṃ nu te akaraṃ bālo , vada kassapa kāraṇaṃ ;
Kena kassapa bālassa , dassanaṃ nābhikaṅkhasi .
92.
Anayaṃ nayati dummedho , adhurāyaṃ niyuñjati ;
Dunnayo seyyaso hoti , sammā vutto pakuppati ;
Vinayaṃ so na jānāti , sādhu tassa adassanaṃ .
93.
Etasmiṃ te sulapite , patirūpe subhāsite ;
Varaṃ kassapa te dammi , yaṃ kiñci manasicchasi .
94.
Varaṃ ce me ado sakka , sabbabhūtānamissara ;
Dhīraṃ passe suṇe dhīraṃ , dhīrena saha saṃvase ;
Dhīrenallāpasallāpaṃ , taṃ kare tañca rocaye .
95.
Kiṃ nu te akaraṃ dhīro , vada kassapa kāraṇaṃ ;
Kena kassapa dhīrassa , dassanaṃ abhikaṅkhasi .
96.
Nayaṃ nayati medhāvī , adhurāyaṃ na yuñjati ;
Sunayo seyyaso hoti , sammā vutto na kuppati ;
Vinayaṃ so pajānāti , sādhu tena samāgamo .
97.
Etasmiṃ te sulapite , patirūpe subhāsite ;
Varaṃ
T1.356 kassapa te dammi , yaṃ kiñci manasicchasi . 98.
Varaṃ ce me ado sakka , sabbabhūtānamissara ;
Tato ratyā vivasāne [ vivasane ( sī . syā . pī .)], sūriyuggamanaṃ [ suriyassuggamanaṃ ( sī . syā . pī .)] pati ;
Dibbā bhakkhā pātubhaveyyuṃ , sīlavanto ca yācakā .
99.
Dadato
V1.207 me [ dadato ca me ( pī .)] na khīyetha , datvā nānutapeyyahaṃ ;Dadaṃ cittaṃ pasādeyyaṃ , etaṃ sakka varaṃ vare .
100.
Etasmiṃ
M1.268 te sulapite , patirūpe subhāsite ;Varaṃ kassapa te dammi , yaṃ kiñci manasicchasi .
101.
Varaṃ ce me ado sakka , sabbabhūtānamissara ;
Na maṃ puna upeyyāsi , etaṃ sakka varaṃ vare .
102.
Bahūhi vatacariyāhi [ vattacariyāhi ( sī . syā . ka .)], narā ca atha nāriyo ;
Dassanaṃ abhikaṅkhanti , kiṃ nu me dassane bhayaṃ .
103.
Taṃ tādisaṃ devavaṇṇaṃ [ devavaṇṇiṃ ( pī .)], sabbakāmasamiddhinaṃ ;
Disvā tapo pamajjeyya [ disvā tapo pamajjeyyaṃ ( sī . syā . pī .), disvānahaṃ pamajjeyyaṃ ( cariyāpiṭakaṭṭhakathā )], etaṃ te dassane bhayanti .
Akittijātakaṃ sattamaṃ .