457. Dhammadevaputtajātakaṃ (3)
26.
Yasokaro puññakarohamasmi , sadātthuto samaṇabrāhmaṇānaṃ ;
Maggāraho devamanussapūjito , dhammo ahaṃ dehi adhamma maggaṃ .
27.
Adhammayānaṃ daḷhamāruhitvā , asantasanto balavāhamasmi ;
Sa kissa hetumhi tavajja dajjaṃ , maggaṃ ahaṃ dhamma adinnapubbaṃ .
28.
Dhammo have pāturahosi pubbe , pacchā
T1.308 adhammo udapādi loke ;Jeṭṭho ca seṭṭho ca sanantano ca , uyyāhi jeṭṭhassa kaniṭṭha maggā .
29.
Na yācanāya napi pātirūpā , na arahatā [ na arahati ( sī . pī .), arahati ( ka .)] tehaṃ dadeyyaṃ maggaṃ ;
Yuddhañca no hotu ubhinnamajja , yuddhamhi yo jessati tassa maggo .
30.
Sabbā
M1.230 disā anuvisaṭohamasmi , mahabbalo amitayaso atulyo ;Guṇehi sabbehi upetarūpo , dhammo adhamma tvaṃ kathaṃ vijessasi .
31.
Lohena ve haññati jātarūpaṃ , na jātarūpena hananti lohaṃ ;
Sace adhammo hañchati [ haññati ( sī . syā .), haññiti ( katthaci )] dhammamajja , ayo suvaṇṇaṃ viya dassaneyyaṃ .
32.
Sace tuvaṃ yuddhabalo adhamma [ yuddhabalo ’ si ’ dhamma ( ka . sī .), yuddhabalo ’ sa ’ dhamma ( pī .)], na tuyha vuḍḍhā [ vaddhā ( sī . pī .)] ca garū ca atthi ;
Maggañca te dammi piyāppiyena , vācāduruttānipi te khamāmi .
33.
Idañca sutvā vacanaṃ adhammo , avaṃsiro
T1.309 patito uddhapādo ;‘‘ Yuddhatthiko ce na labhāmi yuddhaṃ ’’, ettāvatā hoti hato adhammo .
34.
Khantībalo yuddhabalaṃ vijetvā , hantvā adhammaṃ nihanitva [ vihanitvā ( ka .)] bhūmyā ;
Pāyāsi vitto [ citto ( syā .)] abhiruyha sandanaṃ , maggeneva atibalo saccanikkamo .
35.
Mātā pitā samaṇabrāhmaṇā ca , asammānitā yassa sake agāre ;
Idheva nikkhippa sarīradehaṃ , kāyassa bhedā nirayaṃ vajanti te [ vajanti ( sī . pī .)];
Yathā adhammo patito avaṃsiro .
36.
Mātā
M1.231 pitā samaṇabrāhmaṇā ca , susammānitā yassa sake agāre ;Idheva nikkhippa sarīradehaṃ , kāyassa bhedā sugatiṃ vajanti te ;
Yathāpi dhammo abhiruyha sandananti .
Dhammadevaputtajātakaṃ [ dhammajātakaṃ ( sī . pī .)] tatiyaṃ .