7. Bīraṇathambhavaggo
211. Somadattajātakaṃ (2-7-1)
121.
Akāsi yoggaṃ dhuvamappamatto , saṃvaccharaṃ bīraṇathambhakasmiṃ ;
Byākāsi saññaṃ parisaṃ vigayha , na niyyamo tāyati appapaññaṃ .
122.
Dvayaṃ
M1.57 yācanako tāta , somadatta nigacchati ;Alābhaṃ
T1.79 dhanalābhaṃ vā , evaṃ dhammā hi yācanāti .Somadattajātakaṃ paṭhamaṃ .
212. Ucchiṭṭhabhattajātakaṃ (2-7-2)
123.
Añño uparimo vaṇṇo , añño vaṇṇo ca heṭṭhimo ;
Brāhmaṇī tveva pucchāmi , kiṃ heṭṭhā kiñca uppari .
124.
Ahaṃ naṭosmi bhaddante , bhikkhakosmi idhāgato ;
Ayañhi koṭṭhamotiṇṇo , ayaṃ so yaṃ [ tvaṃ ( ka .)] gavesasīti .
Ucchiṭṭhabhattajātakaṃ dutiyaṃ .
213. Bharujātakaṃ (2-7-3)
125.
Isīnamantaraṃ
V1.52 katvā , bharurājāti [ kururājāti ( ka .)] me sutaṃ ;Ucchinno saha raṭṭhehi [ raṭṭhena ( sī . pī .)], sarājā vibhavaṅgato .
126.
Tasmā hi chandāgamanaṃ , nappasaṃsanti paṇḍitā ;
Aduṭṭhacitto bhāseyya , giraṃ saccupasaṃhitanti .
Bharujātakaṃ [ kururātakaṃ ( ka .)] tatiyaṃ .
214. Puṇṇanadījātakaṃ (2-7-4)
127.
Puṇṇaṃ nadiṃ yena ca peyyamāhu , jātaṃ
T1.80 yavaṃ yena ca guyhamāhu ;Dūraṃ gataṃ yena ca avhayanti , so tyāgato [ tyābhato ( syā . ka .) paheḷigāthābhāvo manasi kātabbo ] handa ca bhuñja brāhmaṇa .
128.
Yato maṃ saratī rājā , vāyasampi pahetave ;
Haṃsā koñcā mayūrā ca [ haṃsakoñcamayūrānaṃ ( ka . aṭṭha . pāṭhantaraṃ )], asatīyeva pāpiyāti .
Puṇṇanadījātakaṃ catutthaṃ .
215. Kacchapajātakaṃ (2-7-5)
129.
Avadhī
M1.58 vata attānaṃ , kacchapo byāharaṃ giraṃ [ kacchapova pabyāharaṃ ( syā .), kacchapo so pabyāharaṃ ( ka .)];Suggahītasmiṃ kaṭṭhasmiṃ , vācāya sakiyāvadhi .
130.
Etampi disvā naravīriyaseṭṭha , vācaṃ pamuñce kusalaṃ nātivelaṃ ;
Passasi bahubhāṇena , kacchapaṃ byasanaṃ gatanti .
Kacchapajātakaṃ pañcamaṃ .
216. Macchajātakaṃ (2-7-6)
131.
Na māyamaggi tapati , na sūlo sādhutacchito ;
Yañca maṃ maññate macchī , aññaṃ so ratiyā gato .
132.
So
T1.81 maṃ dahati rāgaggi , cittaṃ cūpatapeti maṃ ;Jālino muñcathāyirā maṃ , na kāme haññate kvacīti .
Macchajātakaṃ chaṭṭhaṃ .
217. Seggujātakaṃ (2-7-7)
133.
Sabbo
V1.53 loko attamano ahosi , akovidā gāmadhammassa seggu ;Komāri ko nāma [ komārikā nāma ( ka .), komāriko nāma ( syā . pī .)] tavajja dhammo , yaṃ tvaṃ gahitā pavane parodasi .
134.
Yo dukkhaphuṭṭhāya bhaveyya tāṇaṃ , so me pitā dubbhi vane karoti ;
Sā kassa kandāmi vanassa majjhe , yo tāyitā so sahasaṃ karotīti .
Seggujātakaṃ sattamaṃ .
218. Kūṭavāṇijajātakaṃ (2-7-8)
135.
Saṭhassa
M1.59 sāṭheyyamidaṃ sucintitaṃ , paccoḍḍitaṃ paṭikūṭassa kūṭaṃ ;Phālañce khādeyyuṃ [ adeyyuṃ ( sī . pī .)] mūsikā , kasmā kumāraṃ kulalā na [ no ( sī . syā . pī .)] hareyyuṃ .
136.
Kūṭassa
T1.82 hi santi [ santīdha ( ka .)] kūṭakūṭā , bhavati [ bhavanti ( ka .)] cāpi nikatino nikatyā ;Dehi puttanaṭṭha phālanaṭṭhassa phālaṃ , mā te puttamahāsi phālanaṭṭhoti .
Kūṭavāṇijajātakaṃ aṭṭhamaṃ .
219. Garahitajātakaṃ (2-7-9)
137.
Hiraññaṃ me suvaṇṇaṃ me , esā rattiṃ divā kathā ;
Dummedhānaṃ manussānaṃ , ariyadhammaṃ apassataṃ .
138.
Dve dve gahapatayo gehe , eko tattha amassuko ;
Lambatthano veṇikato , atho aṅkitakaṇṇako ;
Kīto dhanena bahunā , so taṃ vitudate jananti .
Garahitajātakaṃ navamaṃ .
220. Dhammadhajajātakaṃ (2-7-10)
139.
Sukhaṃ jīvitarūposi , raṭṭhā vivanamāgato ;
So ekako rukkhamūle [ araññasmiṃ ( sī . syā . pī .)], kapaṇo viya jhāyasi .
140.
Sukhaṃ
V1.54 jīvitarūposmi , raṭṭhā vivanamāgato ;So ekako rukkhamūle , kapaṇo viya jhāyāmi ;
Sataṃ
T1.83 dhammaṃ anussaraṃti .Dhammadhajajātakaṃ dasamaṃ .
Bīraṇathambhavaggo sattamo .
Tassuddānaṃ –
Atha
M1.60 bīraṇathambhavaro ca naṭo , bharurājavaruttamapuṇṇanadī ;Bahubhāṇi aggipavane mūsikā , sahalambatthano kapaṇena dasāti .