419. Sulasājātakaṃ (3)
18.
Idaṃ suvaṇṇakāyūraṃ , muttā veḷuriyā bahū ;
Sabbaṃ harassu bhaddante , mañca dāsīti sāvaya .
19.
Oropayassu kalyāṇi , mā bāḷhaṃ [ bahuṃ ( sī . syā . pī .)] paridevasi ;
Na cāhaṃ abhijānāmi , ahantvā dhanamābhataṃ .
20.
Yato sarāmi attānaṃ , yato pattāsmi viññutaṃ ;
Na cāhaṃ abhijānāmi , aññaṃ piyataraṃ tayā .
21.
Ehi taṃ upagūhissaṃ [ upaguyhissaṃ ( ka .)], karissañca padakkhiṇaṃ ;
Na hi dāni puna atthi , mama tuyhañca saṅgamo .
22.
Na
V1.146 hi sabbesu ṭhānesu , puriso hoti paṇḍito ;Itthīpi paṇḍitā hoti , tattha tattha vicakkhaṇā .
23.
Na
M1.178 hi sabbesu ṭhānesu , puriso hoti paṇḍito ;Itthīpi
T1.242 paṇḍitā hoti , lahuṃ atthaṃ vicintikā [ lahumatthavicintikā ( sī . pī .)]. 24.
Lahuñca vata khippañca , nikaṭṭhe samacetayi ;
Migaṃ puṇṇāyateneva [ puṇṇāyataneva ( syā .)], sulasā sattukaṃ vadhi .
25.
Yodha uppatitaṃ atthaṃ , na khippamanubujjhati ;
So haññati mandamati , corova girigabbhare .
26.
Yo ca uppatitaṃ atthaṃ , khippameva nibodhati ;
Muccate sattusambādhā , sulasā sattukāmivāti .
Sulasājātakaṃ tatiyaṃ .