6. Nataṃdaḷhavaggo
201. Bandhanāgārajātakaṃ (2-6-1)
101.
Na taṃ daḷhaṃ bandhanamāhu dhīrā , yadāyasaṃ dārujapabbajañca [ babbajañca ( sī .)];
Sārattarattā maṇikuṇḍalesu , puttesu
T1.74 dāresu ca yā apekkhā . 102.
Etaṃ daḷhaṃ bandhanamāhu dhīrā , ohārinaṃ sithilaṃ duppamuñcaṃ ;
Etampi chetvāna vajanti dhīrā , anapekkhino kāmasukhaṃ pahāyāti .
Bandhanāgārajātakaṃ paṭhamaṃ .
202. Keḷisīlajātakaṃ (2-6-2)
103.
Haṃsā koñcā mayūrā ca , hatthayo [ hatthino ( sī .), hatthiyo ( syā . pī .)] pasadā migā ;
Sabbe sīhassa bhāyanti , natthi kāyasmi tulyatā .
104.
Evameva manussesu , daharo cepi paññavā ;
So hi tattha mahā hoti , neva bālo sarīravāti .
Keḷisīlajātakaṃ dutiyaṃ .
203. Khaṇḍajātakaṃ (2-6-3)
105.
Virūpakkhehi me mettaṃ , mettaṃ erāpathehi me ;
Chabyāputtehi me mettaṃ , mettaṃ kaṇhāgotamakehi ca .
Apādakehi
V1.49M1.54 me mettaṃ , mettaṃ dvipādakehi me ;Catuppadehi me mettaṃ , mettaṃ bahuppadehi me .
Mā
T1.75 maṃ apādako hiṃsi , mā maṃ hiṃsi dvipādako ;Mā maṃ catuppado hiṃsi , mā maṃ hiṃsi bahuppado .
Sabbe sattā sabbe pāṇā , sabbe bhūtā ca kevalā ;
Sabbe bhadrāni passantu , mā kañci [ kiñci ( syā . ka .)] pāpamāgamā .
106.
Appamāṇo buddho , appamāṇo dhammo ;
Appamāṇo saṅgho , pamāṇavantāni sarīsapāni [ sirisapāni ( sī . syā . pī .)];
Ahivicchikasatapadī , uṇṇanābhi [ uṇṇānābhi ( sī . syā . pī .)] sarabūmūsikā .
Katā me rakkhā katā me parittā , paṭikkamantu bhūtāni ;
Sohaṃ namo bhagavato , namo sattannaṃ sammāsambuddhānanti .
Khaṇḍajātakaṃ tatiyaṃ .
204. Vīrakajātakaṃ (2-6-4)
107.
Api vīraka passesi , sakuṇaṃ mañjubhāṇakaṃ ;
Mayūragīvasaṅkāsaṃ , patiṃ mayhaṃ saviṭṭhakaṃ .
108.
Udakathalacarassa pakkhino , niccaṃ āmakamacchabhojino ;
Tassānukaraṃ saviṭṭhako , sevāle paliguṇṭhito matoti .
Vīrakajātakaṃ catutthaṃ .
205. Gaṅgeyyajātakaṃ (2-6-5)
109.
Sobhati maccho gaṅgeyyo , atho sobhati yāmuno [ sobhanti macchā gaṅgeyyā , atho sobhanti yāmunā ( syā . pī .)];
Catuppadoyaṃ
T1.76 puriso , nigrodhaparimaṇḍalo ;Īsakāyata [ īsamāyata ( ka .)] gīvo ca , sabbeva atirocati .
110.
Yaṃ
M1.55 pucchito na taṃ akkhāsi [ akkhā ( sī . syā . pī .)], aññaṃ akkhāsi [ akkhāti ( syā . pī .)] pucchito ;Attappasaṃsako poso , nāyaṃ asmāka ruccatīti .
Gaṅgeyyajātakaṃ pañcamaṃ .
206. Kuruṅgamigajātakaṃ (2-6-6)
111.
Iṅgha
V1.50 vaddhamayaṃ [ vaddhamayaṃ ( sī . syā . pī .)] pāsaṃ , chinda dantehi kacchapa ;Ahaṃ tathā karissāmi , yathā nehiti luddako .
112.
Kacchapo pāvisī vāriṃ , kuruṅgo pāvisī vanaṃ ;
Satapatto dumaggamhā , dūre putte apānayīti .
Kuruṅgamigajātakaṃ chaṭṭhaṃ .
207. Assakajātakaṃ (2-6-7)
113.
Ayamassakarājena , deso vicarito mayā ;
Anukāmaya kāmena [ anukāmayavanukāmena ( sī . pī .)], piyena patinā saha .
114.
Navena sukhadukkhena , porāṇaṃ apidhīyati [ apithīyati ( sī . pī .), apithiyyati ( syā .)];
Tasmā assakaraññāva , kīṭo piyataro mamāti .
Assakajātakaṃ sattamaṃ .
208. Susumārajātakaṃ (2-6-8)
115.
Alaṃ
T1.77 metehi ambehi , jambūhi panasehi ca ;Yāni pāraṃ samuddassa , varaṃ mayhaṃ udumbaro .
116.
Mahatī vata te bondi , na ca paññā tadūpikā ;
Susumāra [ suṃsumāra ( sī . syā . pī .)] vañcito mesi , gaccha dāni yathāsukhanti .
Susumārajātakaṃ aṭṭhamaṃ .
209. Kukkuṭajātakaṃ (2-6-9)
117.
Diṭṭhā
M1.56 mayā vane rukkhā , assakaṇṇā vibhīṭakā [ vibhedakā ( syā . ka .)];Na tāni evaṃ sakkanti , yathā tvaṃ rukkha sakkasi .
118.
Purāṇakukkuṭo [ kakkaro ( sī . syā . pī .)] ayaṃ , bhetvā pañjaramāgato ;
Kusalo vāḷapāsānaṃ , apakkamati bhāsatīti .
Kukkuṭa [ kakkara ( sī . syā . pī .)] jātakaṃ navamaṃ .
210. Kandagalakajātakaṃ (2-6-10)
119.
Ambho
V1.51 ko nāma yaṃ rukkho , sinnapatto [ sīnapatto ( sī . pī .)] sakaṇṭako ;Yattha ekappahārena , uttamaṅgaṃ vibhijjitaṃ [ visāṭikaṃ ( sī . syā . pī .), vighāṭitaṃ ( sī . niyya )].
120.
Acāri vatāyaṃ vitudaṃ vanāni , kaṭṭhaṅgarukkhesu asārakesu ;
Athāsadā
T1.78 khadiraṃ jātasāraṃ [ jātisāraṃ ( ka .)], yatthabbhidā garuḷo uttamaṅganti .Kandagalaka [ kandalaka ( ka .)] jātakaṃ dasamaṃ .
Nataṃdaḷhavaggo chaṭṭho .
Tassuddānaṃ –
Daḷhabandhana haṃsavaro ca puna , virūpakkha saviṭṭhaka macchavaro ;
Sakuruṅga saassaka ambavaro , puna kukkuṭako garuḷena dasāti .