Issues
Editor
Settings
Versions
Select Version
နိဿယ-1
မြန်မာဘာသာ
法护-Dhammapāla
中文
Jātakapāḷi
Jātakapāḷi

2. Santhavavaggo

Author： _System_Pali_VRI_ @ Administrator

2. Santhavavaggo

161. Indasamānagottajātakaṃ (2-2-1)

21.
NaM1.40 santhavaṃ [ sandhavaṃ ( ka .)] kāpurisena kayirā , ariyo anariyena pajānamatthaṃ ;
Cirānuvutthopi karoti pāpaṃ , gajo yathā indasamānagottaṃ .
22.
Yaṃ tveva jaññā sadiso mamanti , sīlena paññāya sutena cāpi ;
Teneva mettiṃ kayirātha saddhiṃ , sukho have sappurisena saṅgamoti .
Indasamānagottajātakaṃ paṭhamaṃ .

162. Santhavajātakaṃ (2-2-2)

23.
NaT1.56 santhavasmā paramatthi pāpiyo , yo santhavo [ sandhavo ( ka .)] kāpurisena hoti ;
Santappito sappinā pāyasena [ pāyāsena ( ka .)], kicchākataṃ paṇṇakuṭiṃ adayhi [ adaḍḍhahi ( sī . syā .), adaṭṭhahi ( pī .), adaddahi (?)].
24.
Na santhavasmā paramatthi seyyo , yo santhavo sappurisena hoti ;
Sīhassa byagghassa ca dīpino ca , sāmā mukhaṃ lehati santhavenāti .
Santhavajātakaṃ dutiyaṃ .

163. Susīmajātakaṃ (2-2-3)

25.
Kāḷā migā setadantā tavīme [ tava ime ( sī . syā . pī .)], parosataṃ hemajālābhichannā [ hemajālābhisañchannā ( sī .)];
Te te dadāmīti susīma brūsi , anussaraṃT1.57 pettipitāmahānaṃ .
26.
KāḷāV1.38M1.41 migā setadantā mamīme [ mama ime ( sī . pī .)], parosataṃ hemajālābhicchannā ;
Te te dadāmīti vadāmi māṇava , anussaraṃ pettipitāmahānanti .
Susīmajātakaṃ tatiyaṃ .

164. Gijjhajātakaṃ (2-2-4)

27.
Yaṃ nu gijjho yojanasataṃ , kuṇapāni avekkhati ;
Kasmā jālañca pāsañca , āsajjāpi na bujjhasi .
28.
Yadā parābhavo hoti , poso jīvitasaṅkhaye ;
Atha jālañca pāsañca , āsajjāpi na bujjhatīti .
Gijjhajātakaṃ catutthaṃ .

165. Nakulajātakaṃ (2-2-5)

29.
Sandhiṃ katvā amittena , aṇḍajena jalābuja ;
Vivariya dāṭhaṃ sesi [ sayasi ( sī . syā . pī .)], kuto te bhayamāgataṃ .
30.
Saṅketheva [ saṅkateva ( ka .)] amittasmiṃ , mittasmimpi na vissase ;
Abhayā bhayamuppannaṃ , api mūlāni kantatīti [ mūlaṃ nikantatīti ( sī .)].
Nakulajātakaṃ pañcamaṃ .

166. Upasāḷakajātakaṃ (2-2-6)

31.
Upasāḷakanāmāni [ upasāḷhakanāmānaṃ ( sī . syā . pī .)], sahassāni catuddasa ;
Asmiṃ padese daḍḍhāni , natthi loke anāmataṃ .
32.
YamhiT1.58 saccañca dhammo ca , ahiṃsā saṃyamo damo ;
Etaṃ ariyā sevanti , etaṃ loke anāmatanti .
Upasāḷakajātakaṃ chaṭṭhaṃ .

167. Samiddhijātakaṃ (2-2-7)

33.
AbhutvāM1.42 bhikkhasi bhikkhu , na hi bhutvāna bhikkhasi ;
Bhutvāna bhikkhu bhikkhassu , mā taṃ kālo upaccagā .
34.
KālaṃV1.39 vohaṃ na jānāmi , channo kālo na dissati ;
Tasmā abhutvā bhikkhāmi , mā maṃ kālo upaccagāti .
Samiddhijātakaṃ sattamaṃ .

168. Sakuṇagghijātakaṃ (2-2-8)

35.
Seno balasā patamāno , lāpaṃ gocaraṭhāyinaṃ ;
Sahasā ajjhappattova , maraṇaṃ tenupāgami .
36.
Sohaṃ nayena sampanno , pettike gocare rato ;
Apetasattu modāmi , sampassaṃ atthamattanoti .
Sakuṇagghijātakaṃ aṭṭhamaṃ .

169. Arakajātakaṃ (2-2-9)

37.
Yo ve mettena cittena , sabbalokānukampati ;
UddhaṃT1.59 adho ca tiriyaṃ , appamāṇena sabbaso .
38.
Appamāṇaṃ hitaṃ cittaṃ , paripuṇṇaṃ subhāvitaṃ ;
Yaṃ pamāṇakataṃ kammaṃ , na taṃ tatrāvasissatīti .
Arakajātakaṃ navamaṃ .

170. Kakaṇṭakajātakaṃ (2-2-10)

39.
Nāyaṃ pure uṇṇamati [ unnamati ( syā .)], toraṇagge kakaṇṭako ;
Mahosadha vijānāhi , kena thaddho kakaṇṭako .
40.
Aladdhapubbaṃ laddhāna , aḍḍhamāsaṃ kakaṇṭako ;
Atimaññati rājānaṃ , vedehaṃ mithilaggahanti .
Kakaṇṭakajātakaṃ dasamaṃ .
Santhavavaggo dutiyo .
Tassuddānaṃ –
AthaM1.43 indasamāna sapaṇṇakuṭi , susimuttama gijjha jalābujako ;
Upasāḷaka bhikkhu salāpavaro , atha mettavaro dasapuṇṇamatīti .