2. Dukanipāto
1. Daḷhavaggo
151. Rājovādajātakaṃ (2-1-1)
1.
Daḷhaṃ
T1.50V1.34M1.36 daḷhassa khipati , balliko [ malliko ( sī . pī .)] mudunā muduṃ ;Sādhumpi sādhunā jeti , asādhumpi asādhunā ;
Etādiso ayaṃ rājā , maggā uyyāhi sārathi .
2.
Akkodhena jine kodhaṃ , asādhuṃ sādhunā jine ;
Jine kadariyaṃ dānena , saccenālikavādinaṃ ;
Etādiso ayaṃ rājā , maggā uyyāhi sārathīti .
Rājovādajātakaṃ paṭhamaṃ .
152. Asamekkhitakammantaṃ , turitābhinipātinaṃ .
Sāni kammāni tappenti , uṇhaṃvajjhohitaṃ mukhe .
4.
Sīho ca sīhanādena , daddaraṃ abhinādayi ;
Sutvā sīhassa nigghosaṃ , siṅgālo [ sigālo ( sī . syā . pī .)] daddare vasaṃ ;
Bhīto santāsamāpādi , hadayañcassa apphalīti .
Siṅgālajātakaṃ [ sigālajātakaṃ ( sī . syā . pī .)] dutiyaṃ .
153. Sūkarajātakaṃ (2-1-3)
5.
Catuppado
T1.51 ahaṃ samma , tvampi samma catuppado ;Ehi samma [ sīha ( sī . pī .)] nivattassu , kiṃ nu bhīto palāyasi .
6.
Asuci
V1.35 pūtilomosi , duggandho vāsi sūkara ;Sace yujjhitukāmosi , jayaṃ samma dadāmi teti .
Sūkarajātakaṃ tatiyaṃ .
154. Uragajātaka (2-1-4)
7.
Idhūragānaṃ
M1.37 pavaro paviṭṭho , selassa vaṇṇena pamokkhamicchaṃ ;Brahmañca vaṇṇaṃ [ vakkaṃ ( ka .)] apacāyamāno , bubhukkhito no vitarāmi [ visahāmi ( ka . si . syā . pī .)] bhottuṃ .
8.
So brahmagutto cirameva jīva , dibyā ca te pātubhavantu bhakkhā ;
Yo brahmavaṇṇaṃ apacāyamāno , bubhukkhito no vitarāsi [ sabbatthapi samānaṃ ] bhottunti .
Uragajātakaṃ catutthaṃ .
155. Bhaggajātakaṃ (2-1-5)
9.
Jīva
T1.52 vassasataṃ bhagga [ gagga ( sī . pī .)], aparāni ca vīsatiṃ [ vīsati ( syā . ka .)];Mā maṃ pisācā khādantu , jīva tvaṃ sarado sataṃ .
10.
Tvampi vassasataṃ jīva , aparāni ca vīsatiṃ ;
Visaṃ pisācā khādantu , jīva tvaṃ sarado satanti .
Bhaggajātakaṃ pañcamaṃ .
156. Alīnacittajātakaṃ (2-1-6)
11.
Alīnacittaṃ nissāya , pahaṭṭhā mahatī camū ;
Kosalaṃ senāsantuṭṭhaṃ , jīvaggāhaṃ agāhayi .
12.
Evaṃ nissayasampanno , bhikkhu āraddhavīriyo ;
Bhāvayaṃ kusalaṃ dhammaṃ , yogakkhemassa pattiyā ;
Pāpuṇe anupubbena , sabbasaṃyojanakkhayanti .
Alīnacittajātakaṃ chaṭṭhaṃ .
157. Guṇajātakaṃ (2-1-7)
13.
Yena
M1.38 kāmaṃ paṇāmeti , dhammo balavataṃ migī ;Unnadantī vijānāhi , jātaṃ saraṇato bhayaṃ .
14.
Api
V1.36 cepi dubbalo mitto , mittadhammesu tiṭṭhati ;So ñātako ca bandhu ca , so mitto so ca me sakhā ;
Dāṭhini
T1.53 mātimaññittho [ maññivo ( syā .), maññavho ( ka .)], siṅgālo mama pāṇadoti .Guṇajātakaṃ sattamaṃ .
158. Suhanujātakaṃ (2-1-8)
15.
Nayidaṃ visamasīlena , soṇena suhanū saha ;
Suhanūpi tādisoyeva , yo soṇassa sagocaro .
16.
Pakkhandinā pagabbhena , niccaṃ sandānakhādinā ;
Sameti pāpaṃ pāpena , sameti asatā asanti .
Suhanujātakaṃ aṭṭhamaṃ .
159. Morajātakaṃ (2-1-9)
17.
Udetayaṃ cakkhumā ekarājā , harissavaṇṇo pathavippabhāso [ paṭhavippabhāso ( sī . syā . pī .)];
Taṃ taṃ namassāmi harissavaṇṇaṃ pathavippabhāsaṃ , tayājja guttā viharemu divasaṃ .
Ye brāhmaṇā vedagū sabbadhamme , te me namo te ca maṃ pālayantu ;
Namatthu buddhānaṃ [ buddhāna (?)] namatthu bodhiyā , namo vimuttānaṃ [ vimuttāna (?)] namo vimuttiyā ;
Imaṃ so parittaṃ katvā , moro carati esanā .
18.
Apetayaṃ
T1.54M1.39 cakkhumā ekarājā , harissavaṇṇo pathavippabhāso ;Taṃ taṃ nammassāmi harissavaṇṇaṃ pathavippabhāsaṃ , tayājja guttā viharemu rattiṃ .
Ye brāhmaṇā vedagū sabbadhamme , te me namo te ca maṃ pālayantu ;
Namatthu buddhānaṃ namatthu bodhiyā , namo vimuttānaṃ namo vimuttiyā ;
Imaṃ so parittaṃ katvā , moro vāsamakappayīti .
Morajātakaṃ navamaṃ .
160. Vinīlajātakaṃ (2-1-10)
19.
Evameva nūna [ nu ( ka .)] rājānaṃ , vedehaṃ mithilaggahaṃ ;
Assā vahanti ājaññā , yathā haṃsā vinīlakaṃ .
20.
Vinīla
V1.37 duggaṃ bhajasi , abhūmiṃ tāta sevasi ;Gāmantakāni [ gāmantikāni ( sī .), gāmantarāni ( ka .)] sevassu , etaṃ mātālayaṃ tavāti .
Vinīlajātakaṃ dasamaṃ .
Daḷhavaggo paṭhamo .
Tassuddānaṃ –
Varaballika
T1.55 daddara sūkarako , uragūttama pañcamabhaggavaro ;Mahatīcamu yāva siṅgālavaro , suhanuttama mora vinīlaṃ dasāti .