Maṇiratanavaṇṇanā
248. Evaṃ pātubhūtaassaratanassa pana rañño cakkavattino catuhatthāyāmaṃ sakaṭanābhisamapariṇāhaṃ ubhosu antesu kaṇṇikapariyantato viniggatehi suparisuddhamuttākalāpehi dvīhi kañcanapadumehi alaṅkataṃ caturāsītimaṇisahassaparivāraṃ tārāgaṇaparivutassa
V2.195 puṇṇacandasassiriṃ pharamānaṃP2.626 viya vepullapabbatato maṇiratanaṃ āgacchati .Tassevaṃ āgatassa muttājālake ṭhapetvā veḷuparamparāya saṭṭhihatthappamāṇaṃ ākāsaṃ āropitassa rattibhāge samantā yojanappamāṇaṃ okāsaṃ ābhā pharati , yāya sabbo so okāso aruṇuggamanavelā viya sañjātāloko hoti .
Tato kassakā kasikammaṃ vāṇijā āpaṇugghāṭanaṃ te te sippino taṃ taṃ kammantaṃ payojenti ‘‘ divā ’’ ti maññamānā .
Mahāsudassanassāpi sabbaṃ taṃ tatheva ahosi .
Tena vuttaṃ –
‘‘ puna ca paraṃ ānanda ,… pe … maṇiratanaṃ pāturahosī ’’ ti .