Subhaddādeviupasaṅkamanavaṇṇanā
265. Etadahosīti kadā etaṃ ahosi .
Rañño kālaṅkiriyadivase .
Tadā kira devatā cintesuṃ –
‘‘ rājā anāthakālaṅkiriyaṃ mā karotu , orodhehi bahūhi dhītūhi puttehi parivāritova karotū ’’ ti .
Atha deviṃ āvaṭṭetvā tassā evaṃ cittaṃ uppādesuṃ .
Pītāni vatthānīti tāni kira pakatiyā rañño manāpāni , tasmā tāni pārupathāti āha .
Ettheva devi tiṭṭhāti devi imaṃ jhānāgāraṃ nāma tumhehi saddhiṃ vasanaṭṭhānaṃ na hoti , jhānarativindanaṭṭhānaṃ mama , mā idha pāvisīti .
266. Etadahosīti loke sattā nāma maraṇāsannakāle ativiya virocanti , tenassa rañño vippasannaindriyabhāvaṃ disvā evaṃ ahosi , tato mā rañño kālaṅkiriyā ahosīti tassa kālaṅkiriyaṃ anicchamānā sampati guṇamassa kathayitvā tiṭṭhamānākāraṃ karissāmīti cintetvā imāni te devātiādimāha .
Tattha chandaṃ janehīti pemaṃ uppādehi , ratiṃ karohi .
Jīvite apekkhan ti jīvite sāpekkhaṃ , ālayaṃ , taṇhaṃ karohīti attho .
Evaṃ kho maṃ tvaṃ devīti ‘‘ mayaṃ kho , deva , itthiyo nāma pabbajitānaṃ upacārakathaṃ na jānāma , kathaṃ vadāma mahārājā ’’ ti rājānaṃ ‘‘ pabbajito ayan ’’ ti maññamānāya deviyā vutte –
‘‘ evaṃ kho maṃ , tvaṃ devi , samudācarāhī ’’ tiādimāha .
Garahitāti buddhehi paccekabuddhehi sāvakehi aññehi ca paṇḍitehi bahussutehi garahitā .
Kiṃ kāraṇā ?
Sāpekkhakālakiriyā
V2.203 hi attanoyeva gehe yakkhakukkuraajagoṇamahiṃsamūsikakukkuṭaūkāmaṅgulādibhāvena nibbattanakāraṇaṃ hoti . 268. Atha
M2.227 kho , ānanda , subhaddā devī assūni puñchitvāti devī ekamantaṃ gantvā roditvā kanditvā assūni puñchitvā etadavoca .