8. Aṭṭhakaniddeso

Author： _System_Pali_VRI_ @ Administrator

8. Aṭṭhakaniddeso

(1) Aṭṭha kilesavatthūni

952. TatthaV0.452 katamāni aṭṭha kilesavatthūni ?

Lobho , doso , moho , māno , diṭṭhi , vicikicchā , thinaṃ , uddhaccaṃ – imāni aṭṭha kilesavatthūni .

(2) Aṭṭha kusītavatthūni

953. TatthaM0.400 katamāni aṭṭha kusītavatthūni ?

( Ka ) idha bhikkhunā kammaṃ kātabbaṃ hoti .

Tassa evaṃ hoti –

‘‘ kammaṃ kho me kātabbaṃ bhavissati .

Kammaṃ kho pana me karontassa kāyo kilamissati .

Handāhaṃ nipajjāmī ’’ ti .

So nipajjati ;

na vīriyaṃ ārabhati appattassa pattiyā , anadhigatassa adhigamāya , asacchikatassa sacchikiriyāya .

Idaṃ paṭhamaṃ kusītavatthu .

( Kha ) puna caparaṃ bhikkhunā kammaṃ kataṃ hoti .

Tassa evaṃ hoti –

‘‘ ahaṃ kho kammaṃ akāsiṃ .

Kammaṃ kho pana me karontassa kāyo kilanto .

Handāhaṃ nipajjāmī ’’ ti .

So nipajjati ;

na vīriyaṃ ārabhati appattassa pattiyā , anadhigatassa adhigamāya , asacchikatassa sacchikiriyāya .

Idaṃ dutiyaṃ kusītavatthu .

( Ga ) puna caparaṃ bhikkhunā maggo gantabbo hoti .

Tassa evaṃP0.386 hoti –

‘‘ maggo kho me gantabbo bhavissati .

Maggaṃ kho pana me gacchantassa kāyo kilamissati .

Handāhaṃ nipajjāmī ’’ ti .

So nipajjati ;

na vīriyaṃ ārabhati appattassa pattiyā , anadhigatassa adhigamāya , asacchikatassa sacchikiriyāya .

Idaṃ tatiyaṃ kusītavatthu .

( Gha ) puna caparaṃ bhikkhunāT0.522 maggo gato hoti .

Tassa evaṃ hoti –

‘‘ ahaṃ kho maggaṃ agamāsiṃ .

Maggaṃ kho pana me gacchantassa kāyo kilanto .

Handāhaṃ nipajjāmī ’’ ti .

So nipajjatiV0.453 ;

na vīriyaṃ ārabhati appattassa pattiyā , anadhigatassa adhigamāya , asacchikatassa sacchikiriyāya .

Idaṃ catutthaṃ kusītavatthu .

( Ṅa ) puna caparaṃ bhikkhu gāmaṃ vā nigamaṃ vā piṇḍāya caranto na labhati lūkhassa vā paṇītassa vā bhojanassa yāvadatthaṃ pāripūriṃ .

Tassa evaṃ hoti –

‘‘ ahaṃ kho gāmaṃ vā nigamaṃ vā piṇḍāya caranto nālatthaṃ lūkhassa vā paṇītassa vā bhojanassa yāvadatthaṃ pāripūriṃ .

Tassa me kāyo kilanto akammañño .

Handāhaṃ nipajjāmī ’’ ti .

So nipajjati ;

na vīriyaṃ ārabhati appattassa pattiyā , anadhigatassa adhigamāya , asacchikatassa sacchikiriyāya .

Idaṃ pañcamaṃ kusītavatthu .

( Ca ) puna caparaṃ bhikkhu gāmaṃ vā nigamaṃ vā piṇḍāya caranto labhati lūkhassa vā paṇītassa vā bhojanassa yāvadatthaṃ pāripūriṃ .

Tassa evaṃ hoti –

‘‘ ahaṃ kho gāmaṃ vā nigamaṃ vā piṇḍāya caranto alatthaṃ lūkhassa vā paṇītassa vāM0.401 bhojanassa yāvadatthaṃ pāripūriṃ .

Tassa me kāyo kilanto akammañño māsācitaṃ maññe .

Handāhaṃ nipajjāmī ’’ ti .

So nipajjati ;

na vīriyaṃ ārabhati appattassa pattiyā , anadhigatassa adhigamāya , asacchikatassa sacchikiriyāya .

Idaṃ chaṭṭhaṃ kusītavatthu .

( Cha ) puna caparaṃ bhikkhuno uppanno hoti appamattako ābādho .

Tassa evaṃ hoti –

‘‘ uppanno kho me ayaṃ appamattako ābādho .

Atthi kappo nipajjituṃT0.523 .

Handāhaṃ nipajjāmī ’’ ti .

So nipajjati ;

na vīriyaṃ ārabhati appattassa pattiyā , anadhigatassa adhigamāya , asacchikatassa sacchikiriyāya .

Idaṃ sattamaṃ kusītavatthu .

( Ja ) puna caparaṃ bhikkhu gilānā vuṭṭhito [ gilānavuṭṭhito ( saddanībhi ) a . ni .6.16 pāḷiyā ṭīkā passitabbā ] hoti aciravuṭṭhito gelaññā .

Tassa evaṃ hoti –

‘‘ ahaṃ kho gilānā vuṭṭhito aciravuṭṭhito gelaññā .

Tassa me kāyo dubbalo akammañño .

Handāhaṃ nipajjāmī ’’ ti .

So nipajjati ;

na vīriyaṃ ārabhati appattassa pattiyā , anadhigatassa adhigamāya , asacchikatassa sacchikiriyāya .

Idaṃ aṭṭhamaṃ kusītavatthu .

Imāni aṭṭha kusītavatthūni .

(3) Aṭṭhasu lokadhammesu cittassa paṭighāto

954. TatthaP0.387V0.454 katamesu aṭṭhasu lokadhammesu cittassa paṭighāto ?

Lābhe sārāgo , alābhe paṭivirodho , yase sārāgo , ayase paṭivirodho , pasaṃsāya sārāgo , nindāya paṭivirodho , sukhe sārāgo , dukkhe paṭivirodho – imesu aṭṭhasu lokadhammesu cittassa paṭighāto .

(4) Aṭṭhaanariyavohārā

955. Tattha katame aṭṭha anariyavohārā ?

Adiṭṭhe diṭṭhavāditā , assute sutavāditā , amute mutavāditā , aviññāte viññātavāditā , diṭṭhe adiṭṭhavāditā , sute assutavāditā , mute amutavāditā , viññāte aviññātavāditā – ime aṭṭha anariyavohārā .

(5) Aṭṭha micchattā

956. Tattha katame aṭṭha micchattā ?

Micchādiṭṭhi , micchāsaṅkappo , micchāvācā , micchākammanto , micchāājīvo , micchāvāyāmo , micchāsati , micchāsamādhi – ime aṭṭha micchattā .

(6) Aṭṭha purisadosā

957. TatthaT0.524M0.402 katame aṭṭha purisadosā ?( Ka ) idha bhikkhū bhikkhuṃ āpattiyā codenti .

So bhikkhu bhikkhūhi āpattiyā codiyamāno [ codiyamāno ( sī . syā .) a . ni .8.14]‘‘ na sarāmi na sarāmī ’’ ti assatiyāva nibbeṭheti .

Ayaṃ paṭhamo purisadoso .

( Kha ) puna caparaṃ bhikkhū bhikkhuṃ āpattiyā codenti .

So bhikkhu bhikkhūhi āpattiyā codiyamāno codakaṃyeva paṭippharati –

‘‘ kiṃ nu kho tuyhaṃ bālassa abyattassa bhaṇitena !

Tvampi nāma maṃ bhaṇitabbaṃ maññasī ’’ ti !

Ayaṃ dutiyo purisadoso .

( Ga ) punaV0.455 caparaṃ bhikkhū bhikkhuṃ āpattiyā codenti .

So bhikkhu bhikkhūhi āpattiyā codiyamāno codakaṃyeva [ codakasseva ( syā .) a . ni .8.14] paccāropeti –

‘‘ tvampi khosi itthannāmaṃ āpattiṃ āpanno .

Tvaṃ tāva paṭhamaṃ paṭikarohī ’’ ti .

Ayaṃ tatiyo purisadoso .

( Gha ) puna caparaṃ bhikkhū bhikkhuṃ āpattiyā codenti .

So bhikkhu bhikkhūhi āpattiyā codiyamāno aññenāññaṃ paṭicarati , bahiddhā kathaṃ apanāmeti , kopañca dosañca appaccayañca pātukaroti .

Ayaṃ catuttho purisadoso .

( Ṅa ) puna caparaṃ bhikkhū bhikkhuṃ āpattiyā codenti .

So bhikkhuP0.388 bhikkhūhi āpattiyā codiyamāno saṅghamajjhe bāhāvikkhepakaṃ bhaṇati .

Ayaṃ pañcamo purisadoso .

( Ca ) puna caparaṃ bhikkhū bhikkhuṃ āpattiyā codenti .

So bhikkhu bhikkhūhi āpattiyā codiyamāno anādiyitvā saṅghaṃ , anādiyitvā codakaṃ , sāpattikova [ āpattikova ( ka .) a . ni .8.14] yenakāmaṃ pakkamati .

Ayaṃ chaṭṭho purisadoso .

( Cha ) puna caparaṃ bhikkhū bhikkhuṃ āpattiyā codenti .

So bhikkhu bhikkhūhi āpattiyā codiyamāno ‘‘ nevāhaṃ āpannomhi , na panāhaṃ anāpannomhī ’’ ti tuṇhībhūto saṅghaṃ viheseti .

AyaṃT0.525 sattamo purisadoso .

( Ja ) puna caparaṃ bhikkhū bhikkhuṃ āpattiyā codenti .

So bhikkhu bhikkhūhi āpattiyā codiyamāno evamāha –

‘‘ kiṃ nu kho tumhe āyasmanto atibāḷhaṃM0.403 mayi byāvaṭā .

Idānāhaṃ sikkhaṃ paccakkhāya hīnāyāvattissāmī ’’ ti .

So sikkhaṃ paccakkhāya hīnāyāvattitvā evamāha –

‘‘ idāni kho tumhe āyasmanto attamanā hothā ’’ ti .

Ayaṃ aṭṭhamo purisadoso .

Ime aṭṭha purisadosā .

(7) Aṭṭha asaññīvādā

958. Tattha katame aṭṭha asaññīvādā ?

‘‘ Rūpī attā hoti arogo paraṃ maraṇā ’’ ti – asaññīti naṃ paññapenti ;

arūpī attā … pe … rūpī ca arūpī ca … pe … nevarūpīnārūpī … pe …‘‘ antavā attā hoti arogo paraṃ maraṇā ’’ ti – asaññīti naṃ paññapenti ;

‘‘ anantavā attā hoti arogo paraṃ maraṇā ’’ ti – asaññīti naṃ paññapenti ;

‘‘ antavāP0.389 ca anantavā ca attā hoti arogo paraṃ maraṇā ’’ ti – asaññīti naṃ paññapenti ;

‘‘ nevantavā nānantavā attā hoti arogo paraṃ maraṇā ’’ ti – asaññīti naṃ paññapenti .

Ime aṭṭha asaññīvādā .

(8) Aṭṭha nevasaññīnāsaññīvādā

959. Tattha katame aṭṭha nevasaññīnāsaññīvādā ?

‘‘ Rūpī attā hoti arogo paraṃ maraṇā ’’ tiV0.456 – nevasaññīnāsaññītiT0.526 naṃ paññapenti ;

‘‘ arūpī attā hoti arogo paraṃ maraṇā ’’ ti – nevasaññīnāsaññīti naṃ paññapenti ;

‘‘ rūpī ca arūpī ca attā hoti arogo paraṃ maraṇā ’’ ti – nevasaññīnāsaññīti naṃ paññapenti ;

‘‘ nevarūpīnārūpī attā hoti arogo paraṃ maraṇā ’’ ti – nevasaññīnāsaññīti naṃ paññapenti ;

‘‘ antavā attā hoti arogo paraṃ maraṇā ’’ ti – nevasaññīnāsaññīti naṃ paññapenti ;

‘‘ anantavā attā hoti arogo paraṃ maraṇā ’’ ti – nevasaññīnāsaññīti naṃ paññapenti ;

‘‘ antavā ca anantavā ca attā hoti arogo paraṃ maraṇā ’’ ti – nevasaññīnāsaññīti naṃ paññapenti ;

‘‘ nevantavā nānantavā attā hoti arogo paraṃ maraṇā ’’ ti – nevasaññīnāsaññīti naṃ paññapenti .

Ime aṭṭha nevasaññīnāsaññīvādā .

Aṭṭhakaṃ .

Issues

Vibhaṅgapāḷi

Vibhaṅgapāḷi