1. Chandiddhipādo
445. Kathañca bhikkhu chandasamādhipadhānasaṅkhārasamannāgataṃ iddhipādaṃ bhāveti ?
Idha bhikkhu yasmiṃ samaye lokuttaraṃ jhānaṃ bhāveti niyyānikaṃ apacayagāmiṃ diṭṭhigatānaṃ pahānāya paṭhamāya bhūmiyā pattiyā vivicceva kāmehi … pe … paṭhamaṃ jhānaṃ upasampajja viharati dukkhapaṭipadaṃ dandhābhiññaṃ , tasmiṃ samaye chandasamādhipadhānasaṅkhārasamannāgataṃ iddhipādaṃ
T0.298 bhāveti . 446. Tattha katamo chando ?
Yo chando chandikatā kattukamyatā kusalo dhammacchando – ayaṃ vuccati ‘‘ chando ’’.
Tattha katamo samādhi ?
Yā cittassa ṭhiti saṇṭhiti … pe … sammāsamādhi samādhisambojjhaṅgo maggaṅgaṃ maggapariyāpannaṃ – ayaṃ vuccati ‘‘ samādhi ’’.
Tattha
V0.249 katamo padhānasaṅkhāro ?Yo cetasiko vīriyārambho … pe … sammāvāyāmo vīriyasambojjhaṅgo maggaṅgaṃ maggapariyāpannaṃ – ayaṃ vuccati ‘‘ padhānasaṅkhāro ’’.
Iti iminā ca chandena , iminā ca samādhinā , iminā ca padhānasaṅkhārena upeto hoti … pe … samannāgato .
Tena vuccati ‘‘ chandasamādhipadhānasaṅkhārasamannāgato ’’ ti .
447. Iddhīti
M0.230 .Yā tesaṃ dhammānaṃ iddhi samiddhi ijjhanā samijjhanā lābho paṭilābho patti sampatti phusanā sacchikiriyā upasampadā .
Iddhipādoti
P0.221 .Tathābhūtassa phasso … pe … paggāho avikkhepo .
Iddhipādaṃ bhāvetīti .
Te dhamme āsevati bhāveti bahulīkaroti .
Tena vuccati ‘‘ iddhipādaṃ bhāvetī ’’ ti .