Rasapathavipātubhāvavaṇṇanā
120. Ekodakībhūtan ti sabbaṃ cakkavāḷaṃ ekodakameva bhūtaṃ .
Andhakāroti tamo .
Andhakāratimisāti cakkhuviññāṇuppattinivāraṇena andhabhāvakaraṇaṃ bahalatamaṃ .
Samatanīti patiṭṭhahi samantato patthari .
Payaso
P3.866 tattassāti tattassa khīrassa .Vaṇṇasampannāti vaṇṇena sampannā .
Kaṇikārapupphasadiso hissā vaṇṇo ahosi .
Gandhasampannāti gandhena sampannā
M3.50 dibbagandhaṃ vāyati .Rasasampannāti rasena sampannā pakkhittadibbojā viya hoti .
Khuddamadhun ti khuddakamakkhikāhi katamadhuṃ .
Aneḷakan ti niddosaṃ makkhikaṇḍakavirahitaṃ .
Lolajātikoti lolasabhāvo .
Atītānantarepi kappe loloyeva .
Ambhoti acchariyajāto āha .
Kimevidaṃ bhavissatīti
V3.45 vaṇṇopissā manāpo gandhopi , raso panassā kīdiso bhavissatīti attho .Yo tattha uppannalobho , so rasapathaviṃ aṅguliyā sāyi , aṅguliyā gahetvā jivhagge ṭhapesi .
Acchādesīti jivhagge ṭhapitamattā satta rasaharaṇīsahassāni pharitvā manāpā hutvā tiṭṭhati .
Taṇhā cassa okkamīti tattha cassa taṇhā uppajji .