Asammāsambuddhappaveditadhammavinayavaṇṇanā
166. Evañhetaṃ , cunda , hotīti bhagavā ānandattherena ārocitepi yasmā na ānandatthero imissā kathāya sāmiko , cundatthero pana sāmiko .
Sova tassā ādimajjhapariyosānaṃ jānāti .
Tasmā bhagavā tena saddhiṃ kathento ‘‘ evañhetaṃ , cunda , hotī ’’ tiādimāha
P3.909 .Tassattho – cunda evañhetaṃ hoti durakkhātādisabhāve dhammavinaye sāvakā dvedhikajātā bhaṇḍanādīni katvā mukhasattīhi vitudantā viharanti .
Idāni yasmā aniyyānikasāsaneneva niyyānikasāsanaṃ pākaṭaṃ hoti , tasmā ādito aniyyānikasāsanameva dassento idha cunda satthā ca hoti asammāsambuddhotiādimāha .
Tattha vokkamma ca tamhā dhammā vattatīti na nirantaraṃ pūreti , okkamitvā okkamitvā antarantaraṃ katvā vattatīti attho .
Tassa te , āvuso , lābhāti tassa tuyhaṃ ete
M3.93 dhammānudhammappaṭipattiādayo lābhā .Suladdhan ti manussattampi te suladdhaṃ .
Tathā paṭipajjatūti evaṃ paṭipajjatu .
Yathā te satthārā dhammo desitoti yena te ākārena satthārā dhammo kathito .
Yo ca samādapetīti yo ca ācariyo samādapeti .
Yañca samādapetīti yaṃ antevāsiṃ samādapeti .
Yo ca samādapitoti yo ca evaṃ samādapito antevāsiko .
Yathā ācariyena samādapitaṃ , tathatthāya paṭipajjati .
Sabbe teti tayopi te .
Ettha hi ācariyo samādapitattā apuññaṃ pasavati , samādinnantevāsiko samādinnattā , paṭipannako paṭipannattā .
Tena vuttaṃ –
‘‘ sabbe te bahuṃ apuññaṃ pasavantī ’’ ti .
Etenupāyena sabbavāresu attho veditabbo .
167. Apicettha
V3.84 ñāyappaṭipannoti kāraṇappaṭipanno .Ñāyamārādhessatīti kāraṇaṃ nipphādessati .
Vīriyaṃ ārabhatīti attano dukkhanibbattakaṃ vīriyaṃ karoti .
Vuttañhetaṃ ‘‘ durakkhāte , bhikkhave , dhammavinaye yo āraddhavīriyo , so dukkhaṃ viharati .
Yo kusīto , so sukhaṃ viharatī ’’ ti ( a . ni .1.318).