Abyākataṭṭhānavaṇṇanā
189. Evaṃ attano asamataṃ anuttarataṃ sabbaññutaṃ dhammarājabhāvaṃ kathetvā idāni ‘‘ puthusamaṇabrāhmaṇānaṃ laddhīsu mayā aññātaṃ adiṭṭhaṃ nāma natthi , sabbaṃ mama ñāṇassa antoyeva parivattatī ’’ ti sīhanādaṃ nadanto ṭhānaṃ kho panetaṃ , cunda , vijjatītiādimāha .
Tattha tathāgatoti satto .
Na hetaṃ , āvuso , atthasaṃhitan ti idhalokaparalokaatthasaṃhitaṃ na hoti .
Na ca dhammasaṃhitan ti navalokuttaradhammanissitaṃ na hoti .
Na
P3.916 ādibrahmacariyakan ti sikkhattayasaṅgahitassa sakalasāsanabrahmacariyassa ādibhūtaṃ na hoti . 190. Idaṃ dukkhanti khotiādīsu taṇhaṃ ṭhapetvā avasesā tebhummakā dhammā idaṃ dukkhanti byākataṃ .
Tasseva dukkhassa pabhāvikā janikā taṇhā dukkhasamudayoti byākataṃ .
Ubhinnaṃ appavatti dukkhanirodhoti byākataṃ .
Dukkhaparijānano samudayapajahano nirodhasacchikaraṇo ariyamaggo dukkhanirodhagāminī paṭipadāti byākataṃ .
‘‘ Etañhi , āvuso , atthasaṃhitan ’’ tiādīsu etaṃ idhalokaparalokaatthanissitaṃ navalokuttaradhammanissitaṃ sakalasāsanabrahmacariyassa ādi padhānaṃ pubbaṅgamanti ayamattho .