Brāhmaṇamaṇḍalādivaṇṇanā
132. Vītaṅgārā
V3.49 vītadhūmāti pacitvā khāditabbābhāvato vigatadhūmaṅgārā .Pannamusalāti koṭṭetvā pacitabbābhāvato patitamusalā .
Ghāsamesamānāti bhikkhācariyavasena yāgubhattaṃ pariyesantā .
Tamenaṃ manussā disvāti te ete manussā passitvā .
Anabhisambhuṇamānāti asahamānā asakkontā .
Ganthe karontāti tayo vede abhisaṅkharontā ceva vācentā ca .
Acchantīti vasanti ,‘‘ acchentī ’’ tipi pāṭho .
Esevattho .
Hīnasammatan ti ‘‘ mante dhārenti mante vācentī ’’ ti kho , vāseṭṭha , idaṃ tena samayena hīnasammataṃ .
Tadetarahi seṭṭhasammatan ti taṃ idāni ‘‘ ettake mante dhārenti ettake mante vācentī ’’ ti seṭṭhasammataṃ jātaṃ .
Brāhmaṇamaṇḍalassāti brāhmaṇagaṇassa .
133. Methunaṃ dhammaṃ samādāyāti methunadhammaṃ samādiyitvā .
Visukammante
P3.871 payojesun ti gorakkha vāṇijakammādike vissute uggate kammante payojesuṃ . 134. Suddā suddāti tena luddācārakammakhuddācārakammunā suddaṃ suddaṃ lahuṃ lahuṃ kucchitaṃ gacchanti , vinassantīti attho .
Ahu khoti hoti kho .
135. Sakaṃ
M3.55 dhammaṃ garahamānoti na setacchattaṃ ussāpanamattena sujjhituṃ sakkāti evaṃ attano khattiyadhammaṃ nindamāno .Esa nayo sabbattha .
‘‘ Imehi kho , vāseṭṭha , catūhi maṇḍalehī ’’ ti iminā imaṃ dasseti ‘‘ samaṇamaṇḍalaṃ nāma visuṃ natthi , yasmā pana na sakkā jātiyā sujjhituṃ , attano attano sammāpaṭipattiyā visuddhi hoti .
Tasmā imehi catūhi maṇḍalehi samaṇamaṇḍalassa abhinibbatti hoti .
Imāni maṇḍalāni samaṇamaṇḍalaṃ anuvattanti , anuvattantāni ca dhammeneva anuvattanti , no adhammena .
Samaṇamaṇḍalañhi āgamma sammāpaṭipattiṃ pūretvā suddhiṃ pāpuṇantī ’’ ti .