Tāvatiṃsadevaupamā
417.‘‘ Tena hi , rājañña , taññevettha paṭipucchissāmi ;
yathā te khameyya , tathā naṃ byākareyyāsi .
Yaṃ kho pana , rājañña , mānussakaṃ vassasataṃ , devānaṃ tāvatiṃsānaṃ eso eko rattindivo [ rattidivo ( ka .)], tāya rattiyā tiṃsarattiyo māso , tena māsena dvādasamāsiyo saṃvaccharo , tena saṃvaccharena dibbaṃ vassasahassaṃ devānaṃ tāvatiṃsānaṃ āyuppamāṇaṃ .
Ye te mittāmaccā ñātisālohitā pāṇātipātā paṭiviratā adinnādānā paṭiviratā kāmesumicchācārā paṭiviratā musāvādā paṭiviratā surāmerayamajjapamādaṭṭhānā paṭiviratā , te kāyassa bhedā paraṃ maraṇā sugatiṃ saggaṃ lokaṃ upapannā devānaṃ tāvatiṃsānaṃ sahabyataṃ .
Sace pana tesaṃ evaṃ bhavissati –
‘ yāva mayaṃ dve vā tīṇi vā rattindivā dibbehi pañcahi kāmaguṇehi samappitā samaṅgībhūtā paricārema , atha mayaṃ pāyāsissa rājaññassa gantvā āroceyyāma –
‘‘ itipi atthi paro loko , atthi sattā opapātikā , atthi sukatadukkaṭānaṃ kammānaṃ phalaṃ vipāko ’’ ti .
Api nu te āgantvā āroceyyuṃ
T2.365 –‘ itipi atthi paro loko , atthi sattā opapātikā , atthi sukatadukkaṭānaṃ kammānaṃ phalaṃ vipāko ’’’ ti ?
‘‘ No hidaṃ , bho kassapa .
Api hi mayaṃ , bho kassapa , ciraṃ kālaṅkatāpi bhaveyyāma .
Ko panetaṃ bhoto kassapassa āroceti
M2.262 –‘ atthi devā tāvatiṃsā ’ ti vā ‘ evaṃdīghāyukā devā tāvatiṃsā ’ ti vā .
Na mayaṃ bhoto
P2.328 kassapassa saddahāma –‘ atthi devā tāvatiṃsā ’ ti vā ‘ evaṃdīghāyukā devā tāvatiṃsā ’ ti vā ’’ ti .