Supinakaupamā
422.‘‘ Tena
V2.248 hi , rājañña , taññevettha paṭipucchissāmi , yathā te khameyya , tathā naṃ byākareyyāsi .Abhijānāsi no tvaṃ , rājañña , divā seyyaṃ upagato supinakaṃ passitā ārāmarāmaṇeyyakaṃ vanarāmaṇeyyakaṃ bhūmirāmaṇeyyakaṃ pokkharaṇīrāmaṇeyyakan ’’ ti ?
‘‘ Abhijānāmahaṃ , bho kassapa , divāseyyaṃ upagato supinakaṃ passitā ārāmarāmaṇeyyakaṃ vanarāmaṇeyyakaṃ bhūmirāmaṇeyyakaṃ pokkharaṇīrāmaṇeyyakan ’’ ti .
‘‘ Rakkhanti taṃ
T2.371 tamhi samaye khujjāpiM2.266 vāmanakāpi velāsikāpi [ celāvikāpi ( syā .), keḷāyikāpi ( sī .)] komārikāpī ’’ ti ?‘‘ Evaṃ , bho kassapa , rakkhanti maṃ tamhi samaye khujjāpi vāmanakāpi velāsikāpi [ celāvikāpi ( syā .), keḷāyikāpi ( sī .)] komārikāpī ’’ ti .
‘‘ Api nu tā tuyhaṃ jīvaṃ passanti pavisantaṃ vā nikkhamantaṃ vā ’’ ti ?
‘‘ No
P2.334 hidaṃ , bho kassapa ’’.‘‘ Tā hi nāma , rājañña , tuyhaṃ jīvantassa jīvantiyo jīvaṃ na passissanti pavisantaṃ vā nikkhamantaṃ vā .
Kiṃ pana tvaṃ kālaṅkatassa jīvaṃ passissasi pavisantaṃ vā nikkhamantaṃ vā .
Imināpi kho te , rājañña , pariyāyena evaṃ hotu –
‘‘ itipi atthi paro loko , atthi sattā opapātikā , atthi sukatadukkaṭānaṃ kammānaṃ phalaṃ vipāko ’’’ ti .
423.‘‘ Kiñcāpi bhavaṃ kassapo evamāha , atha kho evaṃ me ettha hoti –
‘ itipi natthi paro loko , natthi sattā opapātikā , natthi sukatadukkaṭānaṃ kammānaṃ phalaṃ vipāko ’’’ ti .
‘‘ Atthi pana , rājañña , pariyāyo … pe …‘‘ atthi , bho kassapa , pariyāyo … pe … yathā kathaṃ viya rājaññā ’’ ti ?
‘‘ Idha me , bho kassapa , purisā coraṃ āgucāriṃ gahetvā dassenti –
‘ ayaṃ te , bhante , coro āgucārī ;
imassa yaṃ icchasi , taṃ daṇḍaṃ paṇehī ’ ti .
Tyāhaṃ evaṃ vadāmi –
‘ tena hi , bho , imaṃ purisaṃ jīvantaṃyeva tulāya tuletvā jiyāya anassāsakaṃ māretvā punadeva tulāya tulethā ’ ti .
Te me ‘ sādhū ’ ti paṭissutvā taṃ purisaṃ jīvantaṃyeva tulāya tuletvā jiyāya anassāsakaṃ māretvā punadeva tulāya tulenti .
Yadā so jīvati , tadā lahutaro ca hoti mudutaro
T2.372 ca kammaññataro ca .Yadā pana so kālaṅkato hoti tadā garutaro ca hoti patthinnataro ca akammaññataro ca .
Ayampi kho , bho kassapa , pariyāyo , yena me pariyāyena evaṃ hoti –
‘ itipi natthi paro loko , natthi sattā opapātikā , natthi sukatadukkaṭānaṃ kammānaṃ phalaṃ vipāko ’’’ ti .