Saṅkhadhamaupamā

Author： _System_Pali_VRI_ @ Administrator

Saṅkhadhamaupamā

426.‘‘ Tena hi , rājañña , upamaṃ te karissāmi .

Upamāya midhekacce viññū purisā bhāsitassa atthaṃ ājānanti .

Bhūtapubbaṃ , rājañña , aññataro saṅkhadhamo saṅkhaṃ ādāya paccantimaṃ janapadaṃ agamāsi .

So yena aññataro gāmo tenupasaṅkami ;

upasaṅkamitvā majjhe gāmassa ṭhito tikkhattuṃ saṅkhaṃ upalāpetvā saṅkhaṃ bhūmiyaṃ nikkhipitvā ekamantaṃ nisīdi .

Atha kho , rājañña , tesaṃ paccantajanapadānaṃ [ paccantajānaṃ ( sī .)] manussānaṃ etadahosiT2.375 –

‘ ambho kassa nu kho [ etadahosi ‘‘ kissa dukho ( pī .)] eso saddo evaṃrajanīyo evaṃkamanīyo evaṃmadanīyo evaṃbandhanīyo evaṃmucchanīyo ’ ti .

Sannipatitvā taṃ saṅkhadhamaṃ etadavocuṃ –

‘ ambho , kassa nu kho eso saddo evaṃrajanīyo evaṃkamanīyo evaṃmadanīyo evaṃbandhanīyo evaṃmucchanīyo ’ ti .

‘ Eso kho , bho , saṅkho nāma yasseso saddo evaṃrajanīyo evaṃkamanīyo evaṃmadanīyo evaṃbandhanīyo evaṃmucchanīyo ’ ti .

Te taṃ saṅkhaṃ uttānaṃ nipātesuṃ –

‘ vadehi , bho saṅkha , vadehi , bho saṅkhā ’ ti .

Neva so saṅkho saddamakāsi .

Te taṃ saṅkhaṃ avakujjaṃ nipātesuṃ , passena nipātesuṃ , dutiyena passena nipātesuṃ , uddhaṃ ṭhapesuṃ , omuddhakaṃ ṭhapesuṃ , pāṇināP2.338 ākoṭesuṃ , leḍḍunā ākoṭesuṃ , daṇḍena ākoṭesuṃ , satthena ākoṭesuṃ , odhuniṃsuM2.269 sandhuniṃsu niddhuniṃsu –

‘ vadehi , bho saṅkha , vadehi , bho saṅkhā ’ ti .

Neva so saṅkho saddamakāsi .

‘‘ Atha kho , rājañña , tassa saṅkhadhamassa etadahosi –

‘ yāva bālā ime paccantajanapadāmanussā , kathañhi nāma ayoniso saṅkhasaddaṃ gavesissantī ’ ti .

Tesaṃ pekkhamānānaṃ saṅkhaṃ gahetvā tikkhattuṃ saṅkhaṃ upalāpetvā saṅkhaṃ ādāya pakkāmi .

Atha kho , rājañña , tesaṃ paccantajanapadānaṃ manussānaṃ etadahosi –

‘ yadā kira , bho , ayaṃ saṅkho nāma purisasahagatoV2.251 ca hoti vāyāmasahagato [ vāyosahagato ( syā .)] ca vāyusahagato ca , tadāyaṃ saṅkho saddaṃ karoti , yadā panāyaṃ saṅkho neva purisasahagato hoti na vāyāmasahagato na vāyusahagato , nāyaṃ saṅkho saddaṃ karotī ’ tiT2.376 .

Evameva kho , rājañña , yadāyaṃ kāyo āyusahagato ca hoti usmāsahagato ca viññāṇasahagato ca , tadā abhikkamatipi paṭikkamatipi tiṭṭhatipi nisīdatipi seyyampi kappeti , cakkhunāpi rūpaṃ passati , sotenapi saddaṃ suṇāti , ghānenapi gandhaṃ ghāyati , jivhāyapi rasaṃ sāyati , kāyenapi phoṭṭhabbaṃ phusati , manasāpi dhammaṃ vijānāti .

Yadā panāyaṃ kāyo neva āyusahagato hoti , na usmāsahagato , na viññāṇasahagato , tadā neva abhikkamati na paṭikkamati na tiṭṭhati na nisīdati na seyyaṃ kappeti , cakkhunāpi rūpaṃ na passati , sotenapi saddaṃ na suṇāti , ghānenapi gandhaṃ na ghāyati , jivhāyapi rasaṃ na sāyati , kāyenapi phoṭṭhabbaṃ na phusati , manasāpi dhammaṃ na vijānāti .

Imināpi kho te , rājañña , pariyāyena evaṃ hotu –

‘ itipi atthi paro loko , atthi sattā opapātikā , atthi sukatadukkaṭānaṃ kammānaṃ phalaṃ vipāko ’ ti [ vipākoti , paṭhamabhāṇavāraṃ ( syā .)].

427.‘‘ Kiñcāpi bhavaṃ kassapo evamāha , atha kho evaṃP2.339 me ettha hoti –

‘ itipi natthi paro loko , natthi sattā opapātikā , natthi sukatadukkaṭānaṃ kammānaṃ phalaṃ vipāko ’’’ ti .

‘‘ Atthi pana , rājañña , pariyāyo … pe … atthi , bho kassapa , pariyāyo … pe … yathā kathaṃ viya rājaññā ’’ ti ?

‘‘ Idha me , bho kassapa , purisā coraṃ āgucāriṃ gahetvā dassenti –

‘ ayaṃ te , bhante , coro āgucārī , imassa yaṃ icchasi , taṃT2.377 daṇḍaṃ paṇehī ’ ti .

Tyāhaṃ evaṃ vadāmi –

‘ tena hi , bho , imassa purisassa chaviṃ chindathaM2.270 , appeva nāmassa jīvaṃ passeyyāmā ’ ti .

Te tassa purisassa chaviṃ chindanti .

Nevassa mayaṃ jīvaṃ passāma .

Tyāhaṃ evaṃ vadāmi –

‘ tena hi , bho , imassa purisassa cammaṃ chindatha , maṃsaṃ chindatha , nhāruṃ chindatha , aṭṭhiṃ chindatha , aṭṭhimiñjaṃ chindatha , appeva nāmassa jīvaṃ passeyyāmā ’ ti .

Te tassa purisassa aṭṭhimiñjaṃ chindanti , nevassa mayaṃ jīvaṃ passeyyāma .

Ayampi kho , bho kassapa , pariyāyo , yena me pariyāyena evaṃ hoti –

‘ itipi natthi paro loko , natthi sattā opapātikā , natthi sukatadukkaṭānaṃ kammānaṃ phalaṃ vipāko ’’’ ti .

Issues

Select Version

Mahāvaggapāḷi

Mahāvaggapāḷi