Dhammādāsadhammapariyāyā

Author： _System_Pali_VRI_ @ Administrator

Dhammādāsadhammapariyāyā

158.‘‘ Anacchariyaṃ kho panetaṃ , ānanda , yaṃ manussabhūto kālaṅkareyya .

Tasmiṃyeva [ tasmiṃ tasmiṃ ce ( sī . pī .), tasmiṃ tasmiṃ kho ( syā .)] kālaṅkate tathāgataṃ upasaṅkamitvā etamatthaṃ pucchissatha , vihesā hesā , ānanda , tathāgatassa .

Tasmātihānanda , dhammādāsaṃ nāma dhammapariyāyaṃ desessāmi , yena samannāgato ariyasāvako ākaṅkhamāno attanāva attānaṃ byākareyya –

‘ khīṇanirayomhi khīṇatiracchānayoniT2.111 khīṇapettivisayo khīṇāpāyaduggativinipāto , sotāpannohamasmi avinipātadhammo niyato sambodhiparāyaṇo ’ ti .

159.‘‘ Katamo ca so , ānanda , dhammādāso dhammapariyāyo , yena samannāgato ariyasāvako ākaṅkhamāno attanāva attānaṃ byākareyya –

‘ khīṇanirayomhi khīṇatiracchānayoni khīṇapettivisayo khīṇāpāyaduggativinipāto , sotāpannohamasmi avinipātadhammo niyato sambodhiparāyaṇo ’ ti ?

‘‘ IdhānandaM2.80 , ariyasāvako buddhe aveccappasādena samannāgato hoti –

‘ itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavā ’ ti .

‘‘ Dhamme aveccappasādena samannāgato hoti –

‘ svākkhāto bhagavatā dhammo sandiṭṭhiko akāliko ehipassiko opaneyyiko paccattaṃ veditabbo viññūhī ’ ti .

‘‘ Saṅghe aveccappasādena samannāgato hoti –

‘ suppaṭipanno bhagavato sāvakasaṅgho , ujuppaṭipanno bhagavato sāvakasaṅgho , ñāyappaṭipannoP2.94 bhagavato sāvakasaṅgho , sāmīcippaṭipanno bhagavatoV2.74 sāvakasaṅgho yadidaṃ cattāri purisayugāni aṭṭha purisapuggalā , esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassā ’ ti .

‘‘ Ariyakantehi sīlehi samannāgato hoti akhaṇḍehi acchiddehi asabalehi akammāsehi bhujissehi viññūpasatthehi aparāmaṭṭhehi samādhisaṃvattanikehi .

‘‘ Ayaṃ kho so , ānanda , dhammādāso dhammapariyāyo , yena samannāgato ariyasāvako ākaṅkhamāno attanāva attānaṃ byākareyya –

‘ khīṇanirayomhi khīṇatiracchānayoni khīṇapettivisayo khīṇāpāyaduggativinipāto , sotāpannohamasmi avinipātadhammo niyato sambodhiparāyaṇo ’’’ ti .

TatrapiT2.112 sudaṃ bhagavā nātike viharanto giñjakāvasathe etadeva bahulaṃ bhikkhūnaṃ dhammiṃ kathaṃ karoti –

‘‘ Iti sīlaṃ iti samādhi iti paññā .

Sīlaparibhāvito samādhi mahapphalo hoti mahānisaṃso .

Samādhiparibhāvitā paññā mahapphalā hoti mahānisaṃsā .

Paññāparibhāvitaṃ cittaṃ sammadeva āsavehi vimuccati , seyyathidaṃ – kāmāsavā , bhavāsavā , avijjāsavā ’’ ti .

160. AthaM2.81 kho bhagavā nātike yathābhirantaṃ viharitvā āyasmantaṃ ānandaṃ āmantesi –

‘‘ āyāmānanda , yena vesālī tenupasaṅkamissāmā ’’ ti .

‘‘ Evaṃ , bhante ’’ ti kho āyasmā ānando bhagavato paccassosi .

Atha kho bhagavā mahatā bhikkhusaṅghena saddhiṃ yena vesālī tadavasari .

Tatra sudaṃ bhagavā vesāliyaṃ viharati ambapālivane .

Tatra kho bhagavā bhikkhū āmantesi –

‘‘ Sato , bhikkhave , bhikkhu vihareyya sampajāno , ayaṃ vo amhākaṃ anusāsanī .

Kathañca , bhikkhave , bhikkhu sato hoti ?

Idha , bhikkhave , bhikkhu kāye kāyānupassī viharati ātāpī sampajāno satimāP2.95 vineyya loke abhijjhādomanassaṃ .

Vedanāsu vedanānupassī … pe … citte cittānupassī … pe … dhammesu dhammānupassī viharati ātāpī sampajāno satimā vineyya loke abhijjhādomanassaṃ .

Evaṃ kho , bhikkhave , bhikkhu sato hoti .

‘‘ KathañcaV2.75 , bhikkhave , bhikkhu sampajāno hoti ?

Idha , bhikkhave , bhikkhu abhikkante paṭikkante sampajānakārī hoti , ālokite vilokite sampajānakārī hoti , samiñjiteT2.113 pasārite sampajānakārī hoti , saṅghāṭipattacīvaradhāraṇe sampajānakārī hoti , asite pīte khāyite sāyite sampajānakārī hoti , uccārapassāvakamme sampajānakārī hoti , gate ṭhite nisinne sutte jāgarite bhāsite tuṇhībhāve sampajānakārī hoti .

Evaṃ kho , bhikkhave , bhikkhu sampajāno hoti .

Sato , bhikkhave , bhikkhu vihareyya sampajāno , ayaṃ vo amhākaṃ anusāsanī ’’ ti .

Issues

Select Version

Mahāvaggapāḷi

Mahāvaggapāḷi