Sanaṅkumārakathā

Author： _System_Pali_VRI_ @ Administrator

Sanaṅkumārakathā

284.‘ Atha kho , bhante , devā tāvatiṃsā yathāsakesu āsanesu nisīdiṃsu –

‘‘ obhāsametaṃ ñassāma , yaṃvipāko bhavissati , sacchikatvāva naṃ gamissāmā ’’ ti .

Cattāropi mahārājāno yathāsakesu āsanesu nisīdiṃsu –

‘‘ obhāsametaṃ ñassāma yaṃvipāko bhavissati , sacchikatvāvaM2.170 naṃ gamissāmā ’’ ti .

Idaṃ sutvā devā tāvatiṃsā ekaggāP2.210 samāpajjiṃsu –

‘‘ obhāsametaṃ ñassāma , yaṃvipāko bhavissati , sacchikatvāva naṃ gamissāmā ’’ ti .

‘ Yadā , bhante , brahmā sanaṅkumāro devānaṃT2.240 tāvatiṃsānaṃ pātubhavati , oḷārikaṃ attabhāvaṃ abhinimminitvā pātubhavati .

Yo kho pana , bhante , brahmuno pakativaṇṇo anabhisambhavanīyo so devānaṃ tāvatiṃsānaṃ cakkhupathasmiṃ .

Yadā , bhante , brahmā sanaṅkumāro devānaṃ tāvatiṃsānaṃ pātubhavatiV2.155 , so aññe deve atirocati vaṇṇena ceva yasasā ca .

Seyyathāpi , bhante , sovaṇṇo viggaho mānusaṃ viggahaṃ atirocati ;

evameva kho , bhante , yadā brahmā sanaṅkumāro devānaṃ tāvatiṃsānaṃ pātubhavati , so aññe deve atirocati vaṇṇena ceva yasasā ca .

Yadā , bhante , brahmā sanaṅkumāro devānaṃ tāvatiṃsānaṃ pātubhavati , na tassaṃ parisāyaṃ koci devo abhivādeti vā paccuṭṭheti vā āsanena vā nimanteti .

Sabbeva tuṇhībhūtā pañjalikā pallaṅkena nisīdanti –

‘‘ yassadāni devassa pallaṅkaṃ icchissati brahmā sanaṅkumāro , tassa devassa pallaṅke nisīdissatī ’’ ti .

‘ Yassa kho pana , bhante , devassa brahmā sanaṅkumāro pallaṅke nisīdati , uḷāraṃ so labhati devo vedapaṭilābhaṃ ;

uḷāraṃ so labhati devo somanassapaṭilābhaṃ .

Seyyathāpi , bhante , rājā khattiyo muddhāvasitto adhunābhisitto rajjena , uḷāraṃ so labhati vedapaṭilābhaṃ , uḷāraṃ so labhati somanassapaṭilābhaṃ .

Evameva kho , bhante , yassa devassa brahmā sanaṅkumāro pallaṅke nisīdati , uḷāraṃ so labhati devo vedapaṭilābhaṃ , uḷāraṃ so labhati devo somanassapaṭilābhaṃ .

AthaT2.241P2.211 , bhante , brahmā sanaṅkumāro oḷārikaṃ attabhāvaṃ abhinimminitvā kumāravaṇṇī [ kumāravaṇṇo ( syā . ka .)] hutvā pañcasikho devānaṃ tāvatiṃsānaṃ pāturahosi .

So vehāsaṃ abbhuggantvā ākāse antalikkhe pallaṅkena nisīdi .

Seyyathāpi , bhante , balavā puriso supaccatthate vā pallaṅke same vā bhūmibhāge pallaṅkena nisīdeyya ;

evameva kho , bhante , brahmā sanaṅkumāro vehāsaṃ abbhuggantvā ākāse antalikkhe pallaṅkena nisīditvā devānaṃ tāvatiṃsānaṃ sampasādaṃ viditvā imāhi gāthāhi anumodi –

‘‘ ModantiM2.171 vata bho devā , tāvatiṃsā sahindakā ;

Tathāgataṃ namassantā , dhammassa ca sudhammataṃ .

‘‘ Nave deve ca passantā , vaṇṇavante yasassine ;

Sugatasmiṃ brahmacariyaṃ , caritvāna idhāgate .

‘‘ Te aññe atirocanti , vaṇṇena yasasāyunā ;

Sāvakā bhūripaññassa , visesūpagatā idha .

‘‘ IdaṃV2.156 disvāna nandanti , tāvatiṃsā sahindakā ;

Tathāgataṃ namassantā , dhammassa ca sudhammatan ’’ ti .

285.‘ Imamatthaṃ , bhante , brahmā sanaṅkumāro bhāsittha ;

imamatthaṃ , bhante , brahmuno sanaṅkumārassa bhāsato aṭṭhaṅgasamannāgato saro hoti vissaṭṭho ca viññeyyo ca mañju ca savanīyo ca bindu ca avisārī ca gambhīro ca ninnādī ca .

Yathāparisaṃ kho pana , bhante , brahmā sanaṅkumāro sarena viññāpeti ;

na cassa bahiddhā parisāyaT2.242 ghoso niccharati .

Yassa kho pana , bhante , evaṃ aṭṭhaṅgasamannāgato saro hoti , so vuccati ‘‘ brahmassaro ’’ ti .

‘ Atha kho , bhante , brahmā sanaṅkumāro tettiṃse attabhāve abhinimminitvā devānaṃ tāvatiṃsānaṃ paccekapallaṅkesuP2.212 pallaṅkena [ paccekapallaṅkena ( ka .)] nisīditvā deve tāvatiṃse āmantesi –

‘‘ taṃ kiṃ maññanti , bhonto devā tāvatiṃsā , yāvañca so bhagavā bahujanahitāya paṭipanno bahujanasukhāya lokānukampāya atthāya hitāya sukhāya devamanussānaṃ .

Ye hi keci , bho , buddhaṃ saraṇaṃ gatā dhammaṃ saraṇaṃ gatā saṅghaṃ saraṇaṃ gatā sīlesu paripūrakārino te kāyassa bhedā paraṃ maraṇā appekacce paranimmitavasavattīnaṃ devānaṃ sahabyataṃ upapajjanti , appekacce nimmānaratīnaṃ devānaṃ sahabyataṃ upapajjanti , appekacce tusitānaṃ devānaṃ sahabyataṃ upapajjanti , appekacce yāmānaṃ devānaṃ sahabyataṃ upapajjanti , appekacce tāvatiṃsānaṃ devānaṃ sahabyataṃ upapajjanti , appekacce cātumahārājikānaṃ devānaṃ sahabyataṃ upapajjanti .

Ye sabbanihīnaṃ kāyaṃ paripūrenti , te gandhabbakāyaṃ paripūrentī ’’’ ti .

286.‘ ImamatthaṃM2.172 , bhante , brahmā sanaṅkumāro bhāsittha ;

imamatthaṃ , bhante , brahmuno sanaṅkumārassa bhāsato ghosoyeva devā maññanti –

‘‘ yvāyaṃ mama pallaṅke svāyaṃ ekova bhāsatī ’’ ti .

Ekasmiṃ bhāsamānasmiṃ , sabbe bhāsanti nimmitā ;

Ekasmiṃ tuṇhimāsīne , sabbe tuṇhī bhavanti te .

TadāsuT2.243 devā maññanti , tāvatiṃsā sahindakā ;

Yvāyaṃ mama pallaṅkasmiṃ , svāyaṃ ekova bhāsatīti .

‘ AthaV2.157 kho , bhante , brahmā sanaṅkumāro ekattena attānaṃ upasaṃharati , ekattena attānaṃ upasaṃharitvā sakkassaP2.213 devānamindassa pallaṅke pallaṅkena nisīditvā deve tāvatiṃse āmantesi –

Issues

Mahāvaggapāḷi

Mahāvaggapāḷi