Gabbhinīupamā
420.‘‘ Tena
T2.368 hi , rājañña , upamaṃ te karissāmi .Upamāya midhekacce viññū purisā bhāsitassa atthaṃ ājānanti .
Bhūtapubbaṃ , rājañña , aññatarassa brāhmaṇassa
M2.264 dve pajāpatiyo ahesuṃ .Ekissā putto ahosi dasavassuddesiko vā dvādasavassuddesiko vā , ekā gabbhinī upavijaññā .
Atha kho so brāhmaṇo kālamakāsi .
Atha kho so māṇavako mātusapattiṃ [ mātusapatiṃ ( syā .)] etadavoca –
‘ yamidaṃ , bhoti , dhanaṃ vā dhaññaṃ vā rajataṃ vā jātarūpaṃ vā , sabbaṃ taṃ mayhaṃ
P2.331 ;natthi tuyhettha kiñci .
Pitu me [ pitu me santako ( syā .)] bhoti , dāyajjaṃ niyyādehī ’ ti [ nīyyātehīti ( sī . pī .)].
Evaṃ vutte sā brāhmaṇī taṃ māṇavakaṃ etadavoca –
‘ āgamehi tāva , tāta , yāva vijāyāmi .
Sace kumārako bhavissati , tassapi ekadeso bhavissati ;
sace kumārikā bhavissati , sāpi te opabhoggā [ upabhoggā ( syā .)] bhavissatī ’ ti .
Dutiyampi kho so māṇavako mātusapattiṃ etadavoca –
‘ yamidaṃ , bhoti , dhanaṃ vā dhaññaṃ vā rajataṃ vā jātarūpaṃ vā , sabbaṃ taṃ mayhaṃ ;
natthi tuyhettha kiñci .
Pitu me , bhoti , dāyajjaṃ niyyādehī ’ ti .
Dutiyampi kho sā brāhmaṇī taṃ māṇavakaṃ etadavoca –
‘ āgamehi tāva , tāta , yāva vijāyāmi .
Sace kumārako bhavissati , tassapi ekadeso bhavissati ;
sace kumārikā bhavissati sāpi te opabhoggā [ upabhoggā ( syā .)] bhavissatī ’ ti .
Tatiyampi kho so māṇavako mātusapattiṃ etadavoca –
‘ yamidaṃ , bhoti , dhanaṃ vā dhaññaṃ vā rajataṃ vā jātarūpaṃ
V2.247 vāT2.369 , sabbaṃ taṃ mayhaṃ ;natthi tuyhettha kiñci .
Pitu me , bhoti , dāyajjaṃ niyyādehī ’ ti .
‘‘ Atha kho sā brāhmaṇī satthaṃ gahetvā ovarakaṃ pavisitvā udaraṃ opādesi [ uppātesi ( syā .)]–
‘ yāva vijāyāmi yadi vā kumārako yadi vā kumārikā ’ ti .
Sā attānaṃ ceva jīvitañca gabbhañca sāpateyyañca vināsesi .
Yathā taṃ bālā abyattā anayabyasanaṃ āpannā ayoniso dāyajjaṃ gavesantī , evameva kho tvaṃ , rājañña , bālo abyatto anayabyasanaṃ āpajjissasi ayoniso paralokaṃ gavesanto
P2.332 ;seyyathāpi sā brāhmaṇī bālā abyattā anayabyasanaṃ āpannā ayoniso dāyajjaṃ gavesantī .
Na kho , rājañña , samaṇabrāhmaṇā sīlavanto kalyāṇadhammā apakkaṃ paripācenti ;
api ca paripākaṃ āgamenti .
Paṇḍitānaṃ attho hi , rājañña , samaṇabrāhmaṇānaṃ sīlavantānaṃ kalyāṇadhammānaṃ jīvitena .
Yathā yathā kho , rājañña , samaṇabrāhmaṇā sīlavanto kalyāṇadhammā ciraṃ dīghamaddhānaṃ tiṭṭhanti , tathā
M2.265 tathā bahuṃ puññaṃ pasavanti , bahujanahitāya ca paṭipajjanti bahujanasukhāya lokānukampāya atthāya hitāya sukhāya devamanussānaṃ .Imināpi kho te , rājañña , pariyāyena evaṃ hotu –
‘ itipi atthi paro loko , atthi sattā opapātikā , atthi sukatadukkaṭānaṃ kammānaṃ phalaṃ vipāko ’’’ ti .
421.‘‘ Kiñcāpi bhavaṃ kassapo evamāha , atha kho evaṃ me ettha hoti –
‘ itipi natthi paro loko , natthi sattā opapātikā , natthi sukatadukkaṭānaṃ kammānaṃ phalaṃ vipāko ’’’ ti .
‘‘ Atthi pana , rājañña , pariyāyo … pe … atthi , bho kassapa , pariyāyo … pe … yathā kathaṃ viya , rājaññā ’’ ti ?
‘‘ Idha me , bho kassapa , purisā coraṃ
T2.370 āgucāriṃ gahetvā dassenti –‘ ayaṃ te , bhante , coro āgucārī ;
imassa yaṃ icchasi , taṃ daṇḍaṃ paṇehī ’ ti .
Tyāhaṃ evaṃ vadāmi –
‘ tena hi , bho , imaṃ purisaṃ jīvantaṃyeva kumbhiyā pakkhipitvā mukhaṃ pidahitvā allena cammena onandhitvā allāya mattikāya bahalāvalepanaṃ [ bahalavilepanaṃ ( syā . ka .)] karitvā
P2.333 uddhanaṃ āropetvā aggiṃ dethā ’ ti .Te me ‘ sādhū ’ ti paṭissutvā taṃ purisaṃ jīvantaṃyeva kumbhiyā pakkhipitvā mukhaṃ pidahitvā allena cammena onandhitvā allāya mattikāya bahalāvalepanaṃ karitvā uddhanaṃ āropetvā aggiṃ denti .
Yadā mayaṃ jānāma ‘ kālaṅkato so puriso ’ ti , atha naṃ kumbhiṃ oropetvā ubbhinditvā mukhaṃ vivaritvā saṇikaṃ nillokema [ vilokema ( syā .)]–
‘ appeva nāmassa jīvaṃ nikkhamantaṃ passeyyāmā ’ ti .
Nevassa mayaṃ jīvaṃ nikkhamantaṃ passāma .
Ayampi kho , bho kassapa , pariyāyo , yena me pariyāyena evaṃ hoti –
‘ itipi natthi paro loko , natthi sattā opapātikā , natthi sukatadukkaṭānaṃ kammānaṃ phalaṃ vipāko ’’’ ti .