Vassakārabrāhmaṇo

Author： _System_Pali_VRI_ @ Administrator

Vassakārabrāhmaṇo

133.‘‘ Evaṃ , bho ’’ ti kho vassakāro brāhmaṇo magadhamahāmatto rañño māgadhassa ajātasattussa vedehiputtassa paṭissutvā bhaddāni bhaddāni yānāni yojetvā bhaddaṃ bhaddaṃ yānaṃ abhiruhitvāT2.86 bhaddehi bhaddehi yānehi rājagahamhā niyyāsi , yena gijjhakūṭo pabbato tena pāyāsi .

Yāvatikā yānassa bhūmi , yānena gantvā , yānā paccorohitvā pattikova yena bhagavā tenupasaṅkami ;

upasaṅkamitvā bhagavatā saddhiṃ sammodi .

Sammodanīyaṃ kathaṃ sāraṇīyaṃ vītisāretvāV2.57 ekamantaṃM2.62 nisīdi .

Ekamantaṃ nisinno kho vassakāro brāhmaṇo magadhamahāmatto bhagavantaṃ etadavoca –

‘‘ rājā , bho gotama , māgadho ajātasattu vedehiputto bhoto gotamassa pāde sirasā vandati , appābādhaṃ appātaṅkaṃ lahuṭṭhānaṃ balaṃ phāsuvihāraṃ pucchati .

Rājā [ evañca vadeti rājā ( ka .)], bho gotama , māgadho ajātasattu vedehiputto vajjī abhiyātukāmo .

So evamāha –

‘ ahaṃ hime vajjī evaṃmahiddhike evaṃmahānubhāve ucchecchāmi vajjī , vināsessāmi vajjī , anayabyasanaṃ āpādessāmī ’’’ ti .

Issues

Select Version

Mahāvaggapāḷi

Mahāvaggapāḷi