Aṭṭha yathābhuccavaṇṇā

Author： _System_Pali_VRI_ @ Administrator

Aṭṭha yathābhuccavaṇṇā

296.‘‘ Atha kho , bhante , sakko devānamindo devānaṃ tāvatiṃsānaṃ sampasādaṃ viditvā deve tāvatiṃse āmantesi –

‘ iccheyyātha no tumhe , mārisā , tassa bhagavato aṭṭha yathābhucce vaṇṇe sotun ’ ti ?

‘ Icchāma mayaṃ , mārisa , tassa bhagavato aṭṭha yathābhucce vaṇṇe sotun ’ ti .

Atha kho , bhante , sakko devānamindo devānaṃ tāvatiṃsānaṃ bhagavato aṭṭha yathābhucce vaṇṇe payirudāhāsi –

‘ taṃ kiṃ maññanti , bhonto devā tāvatiṃsā ?

Yāvañca so bhagavā bahujanahitāya paṭipanno bahujanasukhāya lokānukampāya atthāya hitāya sukhāya devamanussānaṃ .

EvaṃV2.164 bahujanahitāya paṭipannaṃ bahujanasukhāya lokānukampāya atthāya hitāya sukhāya devamanussānaṃ imināpaṅgena samannāgataṃ satthāraṃ neva atītaṃse samanupassāma , na panetarahi , aññatra tena bhagavatā .

‘‘ SvākkhātoM2.180 kho pana tena bhagavatā dhammo sandiṭṭhiko akāliko ehipassiko opaneyyiko paccattaṃ veditabbo viññūhi .

Evaṃ opaneyyikassa dhammassa desetāraṃ imināpaṅgena samannāgataṃ satthāraṃ neva atītaṃse samanupassāma , na panetarahi , aññatra tena bhagavatā .

‘‘ Idaṃ kusalanti kho pana tena bhagavatā supaññattaṃ , idaṃ akusalanti supaññattaṃ .

Idaṃ sāvajjaṃP2.223 idaṃ anavajjaṃ , idaṃ sevitabbaṃ idaṃ na sevitabbaṃ , idaṃ hīnaṃ idaṃ paṇītaṃ , idaṃ kaṇhasukkasappaṭibhāganti supaññattaṃ .

Evaṃ kusalākusalasāvajjānavajjasevitabbāsevitabbahīna-paṇītakaṇhasukkasappaṭibhāgānaṃT2.255 dhammānaṃ paññapetāraṃ imināpaṅgena samannāgataṃ satthāraṃ neva atītaṃse samanupassāma , na panetarahi , aññatra tena bhagavatā .

‘‘ Supaññattā kho pana tena bhagavatā sāvakānaṃ nibbānagāminī paṭipadā , saṃsandati nibbānañca paṭipadā ca .

Seyyathāpi nāma gaṅgodakaṃ yamunodakena saṃsandati sameti , evameva supaññattā tena bhagavatā sāvakānaṃ nibbānagāminī paṭipadā , saṃsandati nibbānañca paṭipadā ca .

Evaṃ nibbānagāminiyā paṭipadāya paññapetāraṃ imināpaṅgena samannāgataṃ satthāraṃ neva atītaṃse samanupassāma , na panetarahi , aññatra tena bhagavatā .

‘‘ Abhinipphanno [ abhinippanno ( pī . ka .)] kho pana tassa bhagavato lābho abhinipphanno siloko , yāva maññe khattiyā sampiyāyamānarūpā viharanti , vigatamado kho pana so bhagavā āhāraṃ āhāreti .

Evaṃ vigatamadaṃ āhāraṃ āharayamānaṃ imināpaṅgena samannāgataṃ satthāraṃ nevaP2.224 atītaṃse samanupassāma , na panetarahi , aññatra tena bhagavatā .

‘‘ Laddhasahāyo kho pana so bhagavā sekhānañceva paṭipannānaṃ khīṇāsavānañca vusitavataṃ .

Te bhagavā apanujja ekārāmataṃ anuyutto viharati .

Evaṃ ekārāmataṃ anuyuttaṃ imināpaṅgena samannāgataṃ satthāraṃ neva atītaṃse samanupassāma , na panetarahi , aññatra tena bhagavatā .

‘‘ YathāvādīV2.165 kho pana so bhagavā tathākārī , yathākārī tathāvādī , iti yathāvādī tathākārī , yathākārīT2.256 tathāvādī .

Evaṃ dhammānudhammappaṭipannaṃ imināpaṅgena samannāgataṃ satthāraṃ neva atītaṃse samanupassāma , na panetarahi , aññatra tena bhagavatā .

‘‘ TiṇṇavicikicchoM2.181 kho pana so bhagavā vigatakathaṃkatho pariyositasaṅkappo ajjhāsayaṃ ādibrahmacariyaṃ .

Evaṃ tiṇṇavicikicchaṃ vigatakathaṃkathaṃ pariyositasaṅkappaṃ ajjhāsayaṃ ādibrahmacariyaṃ imināpaṅgena samannāgataṃ satthāraṃ neva atītaṃse samanupassāma , na panetarahi , aññatra tena bhagavatā ’ ti .

297.‘‘ Ime kho , bhante , sakko devānamindo devānaṃ tāvatiṃsānaṃ bhagavato aṭṭha yathābhucce vaṇṇe payirudāhāsi .

Tena sudaṃ , bhante , devā tāvatiṃsā bhiyyoso mattāya attamanā honti pamuditā pītisomanassajātā bhagavato aṭṭha yathābhucce vaṇṇe sutvā .

Tatra , bhante , ekacce devā evamāhaṃsu –

‘ aho vata , mārisā , cattāro sammāsambuddhā loke uppajjeyyuṃ dhammañca deseyyuṃ yathariva bhagavā .

Tadassa bahujanahitāya bahujanasukhāya lokānukampāya atthāya hitāya sukhāya devamanussānan ’ ti .

Ekacce devā evamāhaṃsu –

‘ tiṭṭhantu , mārisā , cattāro sammāsambuddhā , aho vata , mārisā , tayo sammāsambuddhā loke uppajjeyyuṃ dhammañca deseyyuṃ yathariva bhagavā .

Tadassa bahujanahitāya bahujanasukhāya lokānukampāya atthāya hitāya sukhāya devamanussānan ’ ti .

Ekacce devā evamāhaṃsu –

‘ tiṭṭhantu , mārisā , tayoT2.257 sammāsambuddhā , aho vata , mārisā , dve sammāsambuddhā loke uppajjeyyuṃ dhammañca deseyyuṃ yathariva bhagavā .

Tadassa bahujanahitāya bahujanasukhāya lokānukampāya atthāya hitāya sukhāya devamanussānan ’ ti .

298.‘‘ Evaṃ vutteP2.225 , bhante , sakko devānamindo deve tāvatiṃse etadavoca –

‘ aṭṭhānaṃ kho etaṃ , mārisā , anavakāso , yaṃ ekissā lokadhātuyā dve arahanto sammāsambuddhā apubbaṃ acarimaṃ uppajjeyyuṃ , netaṃ ṭhānaṃ vijjati .

Aho vata , mārisā , so bhagavā appābādho appātaṅko ciraṃ dīghamaddhānaṃ tiṭṭheyya .

Tadassa bahujanahitāya bahujanasukhāya lokānukampāya atthāya hitāya sukhāya devamanussānan ’ ti .

Atha kho , bhante , yenatthena devā tāvatiṃsā sudhammāyaṃ sabhāyaṃ sannisinnā honti sannipatitā , taṃ atthaṃ cintayitvā taṃ atthaṃ mantayitvā vuttavacanāpi taṃ cattāro mahārājāno tasmiṃ atthe honti .

PaccānusiṭṭhavacanāpiM2.182 taṃ cattāro mahārājāno tasmiṃ atthe honti , sakesu sakesu āsanesu ṭhitā avipakkantā .

TeV2.166 vuttavākyā rājāno , paṭiggayhānusāsaniṃ ;

Vippasannamanā santā , aṭṭhaṃsu samhi āsaneti .

299.‘‘ Atha kho , bhante , uttarāya disāya uḷāro āloko sañjāyi , obhāso pāturahosi atikkammeva devānaṃ devānubhāvaṃ .

Atha kho , bhante , sakko devānamindo deve tāvatiṃse āmantesi –

‘ yathā kho , mārisā , nimittāni dissanti , uḷāro āloko sañjāyati , obhāso pātubhavatiT2.258 , brahmā pātubhavissati ;

brahmuno hetaṃ pubbanimittaṃ pātubhāvāya , yadidaṃ āloko sañjāyati obhāso pātubhavatīti .

‘ Yathā nimittā dissanti , brahmā pātubhavissati ;

Brahmuno hetaṃ nimittaṃ , obhāso vipulo mahā ’ ti .

Issues

Select Version

Mahāvaggapāḷi

Mahāvaggapāḷi