Buddhasarīrapūjā

Author： _System_Pali_VRI_ @ Administrator

Buddhasarīrapūjā

227. AthaM2.131 kho kosinārakā mallā purise āṇāpesuṃ –

‘‘ tena hi , bhaṇe , kusinārāyaṃ gandhamālañca sabbañca tāḷāvacaraṃ sannipātethā ’’ ti .

Atha kho kosinārakā mallā gandhamālañca sabbañca tāḷāvacaraṃ pañca ca dussayugasatāni ādāya yena upavattanaṃ mallānaṃ sālavanaṃ , yena bhagavato sarīraṃ tenupasaṅkamiṃsu ;

upasaṅkamitvā bhagavato sarīraṃ naccehi gītehi vāditehi mālehi gandhehi sakkarontā garuṃ karontā mānentā pūjentā celavitānāni karontā maṇḍalamāḷe paṭiyādentā ekadivasaṃ vītināmesuṃ .

Atha kho kosinārakānaṃ mallānaṃ etadahosi –

‘‘ ativikālo kho ajja bhagavato sarīraṃ jhāpetuṃ , sve dāni mayaṃ bhagavato sarīraṃ jhāpessāmā ’’ ti .

Atha kho kosinārakā mallā bhagavato sarīraṃ naccehi gītehi vāditehi mālehi gandhehi sakkarontā garuṃ karontā mānentāV2.120 pūjentā celavitānāni karontā maṇḍalamāḷe paṭiyādentā dutiyampi divasaṃ vītināmesuṃ , tatiyampiT2.185 divasaṃ vītināmesuṃ , catutthampi divasaṃ vītināmesuṃ , pañcamampi divasaṃ vītināmesuṃ , chaṭṭhampi divasaṃ vītināmesuṃ .

Atha kho sattamaṃ divasaṃ kosinārakānaṃ mallānaṃP2.160 etadahosi –

‘‘ mayaṃ bhagavato sarīraṃ naccehi gītehi vāditehi mālehi gandhehi sakkarontā garuṃ karontā mānentā pūjentā dakkhiṇena dakkhiṇaṃ nagarassa haritvā bāhirena bāhiraṃ dakkhiṇato nagarassa bhagavato sarīraṃ jhāpessāmā ’’ ti .

228. Tena kho pana samayena aṭṭha mallapāmokkhā sīsaṃnhātā ahatāni vatthāni nivatthā ‘‘ mayaṃ bhagavato sarīraṃ uccāressāmā ’’ ti na sakkonti uccāretuṃ .

Atha kho kosinārakā mallā āyasmantaṃ anuruddhaṃ etadavocuṃ –

‘‘ ko nu kho , bhante anuruddha , hetu ko paccayo , yenime aṭṭha mallapāmokkhā sīsaṃnhātā ahatāni vatthāni nivatthā ‘ mayaṃ bhagavato sarīraṃ uccāressāmā ’ ti na sakkonti uccāretun ’’ ti ?

‘‘ Aññathā kho , vāseṭṭhā , tumhākaṃ adhippāyo , aññathā devatānaṃ adhippāyo ’’ ti .

‘‘ Kathaṃ pana , bhante , devatānaṃ adhippāyo ’’ ti ?

‘‘ Tumhākaṃ kho , vāseṭṭhā , adhippāyo –

‘ mayaṃ bhagavato sarīraṃ naccehi gītehi vāditehi mālehi gandhehiM2.132 sakkarontā garuṃ karontā mānentā pūjentā dakkhiṇena dakkhiṇaṃ nagarassa haritvā bāhirena bāhiraṃ dakkhiṇato nagarassa bhagavato sarīraṃ jhāpessāmā ’ ti ;

devatānaṃ kho , vāseṭṭhā , adhippāyo –

‘ mayaṃ bhagavato sarīraṃ dibbehi naccehiT2.186 gītehi vāditehi gandhehi sakkarontā garuṃ karontā mānentā pūjentā uttarena uttaraṃ nagarassa haritvā uttarena dvārena nagaraṃ pavesetvā majjhena majjhaṃ nagarassa haritvā puratthimena dvārena nikkhamitvā puratthimato nagarassa makuṭabandhanaṃ nāma mallānaṃ cetiyaṃ ettha bhagavato sarīraṃ jhāpessāmā ’ ti .

‘‘ Yathā , bhante , devatānaṃ adhippāyo , tathā hotū ’’ ti .

229. Tena kho pana samayena kusinārā yāva sandhisamalasaṃkaṭīrā jaṇṇumattena odhinā mandāravapupphehi santhatā [ saṇṭhitā ( syā .)] hoti .

Atha kho devatā ca kosinārakā ca mallā bhagavato sarīraṃ dibbehi ca mānusakehi ca naccehiP2.161 gītehi vāditehi mālehi gandhehi sakkarontā garuṃ karontā mānentā pūjentā uttarena uttaraṃ nagarassa haritvā uttarena dvārena nagaraṃ pavesetvā majjhena majjhaṃ nagarassa haritvā puratthimena dvārena nikkhamitvā puratthimato nagarassa makuṭabandhanaṃ nāma mallānaṃ cetiyaṃ ettha ca bhagavato sarīraṃ nikkhipiṃsu .

230. AthaV2.121 kho kosinārakā mallā āyasmantaṃ ānandaṃ etadavocuṃ –

‘‘ kathaṃ mayaṃ , bhante ānanda , tathāgatassa sarīre paṭipajjāmā ’’ ti ?

‘‘ Yathā kho , vāseṭṭhā , rañño cakkavattissa sarīre paṭipajjanti , evaṃ tathāgatassa sarīre paṭipajjitabban ’’ ti .

‘‘ Kathaṃ pana , bhante ānanda , rañño cakkavattissa sarīre paṭipajjantī ’’ ti ?

‘‘ Rañño , vāseṭṭhā , cakkavattissa sarīraṃ ahatena vatthena veṭhenti , ahatena vatthena veṭhetvā vihatena kappāsena veṭhenti , vihatena kappāsenaT2.187 veṭhetvā ahatena vatthena veṭhenti .

Etena upāyena pañcahi yugasatehi rañño cakkavattissa sarīraṃ veṭhetvā āyasāya teladoṇiyā pakkhipitvā aññissā āyasāya doṇiyā paṭikujjitvā sabbagandhānaṃ citakaṃ karitvā rañño cakkavattissa sarīraṃ jhāpenti .

Cātumahāpathe rañño cakkavattissa thūpaṃ karontiM2.133 .

Evaṃ kho , vāseṭṭhā , rañño cakkavattissa sarīre paṭipajjanti .

Yathā kho , vāseṭṭhā , rañño cakkavattissa sarīre paṭipajjanti , evaṃ tathāgatassa sarīre paṭipajjitabbaṃ .

Cātumahāpathe tathāgatassa thūpo kātabbo .

Tattha ye mālaṃ vā gandhaṃ vā cuṇṇakaṃ vā āropessanti vā abhivādessanti vā cittaṃ vā pasādessanti , tesaṃ taṃ bhavissati dīgharattaṃ hitāya sukhāyā ’’ ti .

Atha kho kosinārakā mallā purise āṇāpesuṃ –

‘‘ tena hi , bhaṇe , mallānaṃ vihataṃ kappāsaṃ sannipātethā ’’ ti .

Atha kho kosinārakā mallā bhagavato sarīraṃ ahatena vatthena veṭhetvā vihatena kappāsena veṭhesuṃ , vihatena kappāsena veṭhetvā ahatena vatthenaP2.162 veṭhesuṃ .

Etena upāyena pañcahi yugasatehi bhagavato sarīraṃ veṭhetvā āyasāya teladoṇiyā pakkhipitvā aññissā āyasāya doṇiyā paṭikujjitvā sabbagandhānaṃ citakaṃ karitvā bhagavato sarīraṃ citakaṃ āropesuṃ .

Issues

Select Version

Mahāvaggapāḷi

Mahāvaggapāḷi