Sāṇabhārikaupamā

作者： _System_Pali_VRI_ @ Administrator

Sāṇabhārikaupamā

436.‘‘ TenaV2.258 hi , rājañña , upamaṃ te karissāmi , upamāya midhekacce viññūT2.388 purisā bhāsitassa atthaṃ ājānanti .

Bhūtapubbaṃ , rājañña , aññataro janapado vuṭṭhāsi .

Atha kho sahāyako sahāyakaṃ āmantesi –

‘ āyāma , samma , yena so janapado tenupasaṅkamissāma , appeva nāmettha kiñci dhanaṃ adhigaccheyyāmā ’ ti .

‘ Evaṃ sammā ’ ti kho sahāyako sahāyakassa paccassosi .

Te yena so janapado , yena aññataraṃ gāmapaṭṭaṃ [ gāmapajjaṃ ( syā .), gāmapattaṃ ( sī .)] tenupasaṅkamiṃsuP2.350 , tattha addasaṃsu pahūtaṃ sāṇaṃ chaḍḍitaṃ , disvā sahāyako sahāyakaṃ āmantesi –

‘ idaṃ kho , samma , pahūtaṃ sāṇaṃ chaḍḍitaṃ , tena hi , samma , tvañca sāṇabhāraṃ bandha , ahañca sāṇabhāraṃ bandhissāmi , ubho sāṇabhāraṃ ādāya gamissāmā ’ ti .

‘ Evaṃ sammā ’ ti kho sahāyako sahāyakassa paṭissutvā sāṇabhāraṃ bandhitvā te ubho sāṇabhāraṃ ādāya yena aññataraṃ gāmapaṭṭaṃ tenupasaṅkamiṃsu .

Tattha addasaṃsu pahūtaṃ sāṇasuttaṃ chaḍḍitaṃ , disvā sahāyako sahāyakaṃ āmantesi –

‘ yassa kho , samma , atthāya iccheyyāma sāṇaṃ , idaṃ pahūtaṃ sāṇasuttaṃ chaḍḍitaṃ .

Tena hi , samma , tvañca sāṇabhāraṃ chaḍḍehi , ahañca sāṇabhāraṃ chaḍḍessāmi , ubho sāṇasuttabhāraṃ ādāya gamissāmā ’ ti .

‘ Ayaṃ kho me , samma , sāṇabhāro dūrābhato ca susannaddho ca , alaṃ me tvaṃ pajānāhī ’ ti .

Atha kho so sahāyako sāṇabhāraṃ chaḍḍetvā sāṇasuttabhāraṃ ādiyi .

‘‘ Te yena aññataraṃ gāmapaṭṭaṃ tenupasaṅkamiṃsu .

Tattha addasaṃsu pahūtā sāṇiyo chaḍḍitā , disvā sahāyako sahāyakaṃ āmantesi –

‘ yassa khoT2.389 , samma , atthāya iccheyyāma sāṇaṃ vā sāṇasuttaṃ vā , imā pahūtā sāṇiyo chaḍḍitā .

Tena hi , samma , tvañca sāṇabhāraṃ chaḍḍehi , ahañca sāṇasuttabhāraṃ chaḍḍessāmi , ubho sāṇibhāraṃ ādāya gamissāmā ’ tiM2.278 .

‘ Ayaṃ kho me , samma , sāṇabhāro dūrābhato ca susannaddho ca , alaṃ me , tvaṃ pajānāhī ’ ti .

Atha kho so sahāyako sāṇasuttabhāraṃ chaḍḍetvā sāṇibhāraṃ ādiyi .

‘‘ TeP2.351 yena aññataraṃ gāmapaṭṭaṃ tenupasaṅkamiṃsu .

Tattha addasaṃsu pahūtaṃ khomaṃ chaḍḍitaṃ , disvā … pe … pahūtaṃ khomasuttaṃ chaḍḍitaṃ , disvā … pahūtaṃ khomadussaṃ chaḍḍitaṃ , disvā … pahūtaṃ kappāsaṃ chaḍḍitaṃ , disvā … pahūtaṃ kappāsikasuttaṃ chaḍḍitaṃ , disvā … pahūtaṃ kappāsikadussaṃ chaḍḍitaṃ , disvā … pahūtaṃ ayaṃ [ ayasaṃ ( syā .)] chaḍḍitaṃ , disvā … pahūtaṃ lohaṃ chaḍḍitaṃ , disvā … pahūtaṃ tipuṃ chaḍḍitaṃ , disvā … pahūtaṃ sīsaṃ chaḍḍitaṃ , disvā … pahūtaṃ sajjhaṃ [ sajjhuṃ ( sī . syā . pī .)] chaḍḍitaṃ , disvā … pahūtaṃ suvaṇṇaṃ chaḍḍitaṃ , disvā sahāyako sahāyakaṃ āmantesi –

‘ yassa kho , samma , atthāya iccheyyāmaV2.259 sāṇaṃ vā sāṇasuttaṃ vā sāṇiyo vā khomaṃ vā khomasuttaṃ vā khomadussaṃ vā kappāsaṃ vā kappāsikasuttaṃ vā kappāsikadussaṃ vā ayaṃ vā lohaṃ vā tipuṃ vā sīsaṃ vā sajjhaṃ vā , idaṃ pahūtaṃ suvaṇṇaṃ chaḍḍitaṃ .

Tena hi , samma , tvañca sāṇabhāraṃ chaḍḍehi , ahañca sajjhabhāraṃ [ sajjhubhāraṃ ( sī . syā . pī .)] chaḍḍessāmi , ubho suvaṇṇabhāraṃ ādāya gamissāmā ’ ti .

‘ Ayaṃ kho me , samma , sāṇabhāro dūrābhato ca susannaddhoT2.390 ca , alaṃ me tvaṃ pajānāhī ’ ti .

Atha kho so sahāyako sajjhabhāraṃ chaḍḍetvā suvaṇṇabhāraṃ ādiyi .

‘‘ Te yena sako gāmo tenupasaṅkamiṃsu .

Tattha yo so sahāyako sāṇabhāraṃ ādāya agamāsi , tassa neva mātāpitaro abhinandiṃsu , na puttadārā abhinandiṃsu , na mittāmaccā abhinandiṃsu , na ca tatonidānaṃ sukhaṃ somanassaṃP2.352 adhigacchi .

Yo pana so sahāyako suvaṇṇabhāraṃ ādāya agamāsi , tassa mātāpitaropi abhinandiṃsu , puttadārāpi abhinandiṃsu , mittāmaccāpi abhinandiṃsu , tatonidānañca sukhaṃ somanassaṃ adhigacchi .

‘‘ Evameva kho tvaṃ , rājañña , sāṇabhārikūpamo maññe paṭibhāsi .

Paṭinissajjetaṃ , rājañña , pāpakaṃ diṭṭhigataṃ ;

paṭinissajjetaṃ , rājañña , pāpakaṃ diṭṭhigataṃ .

Mā te ahosi dīgharattaṃ ahitāya dukkhāyā ’’ ti .

Issues

選擇版本

Mahāvaggapāḷi

Mahāvaggapāḷi