Cittānupassanāniddesavaṇṇanā
365. Cittānupassanāniddesepi
V0.254 heṭṭhā vuttasadisaṃ vuttanayeneva veditabbaṃ .Sarāgaṃ vā cittan tiādīsu pana sarāgan ti aṭṭhavidhaṃ lobhasahagataṃ .
Vītarāgan ti lokiyakusalābyākataṃ .
Idaṃ pana yasmā sammasanaṃ na
M0.256 dhammasamodhānaṃ , tasmā idha ekapadepi lokuttaraṃ na labbhati .Yasmā pahānekaṭṭhavasena rāgādīhi saha vattanti pahīyanti , tasmā dvīsu padesu nippariyāyena na labbhantīti na gahitāni .
Sesāni cattāri akusalacittāni neva purimapadaṃ , na pacchimapadaṃ bhajanti .
Sadosan ti duvidhaṃ domanassasahagataṃ .
Vītadosan ti lokiyakusalābyākataṃ .
Sesāni dasa akusalacittāni neva purimapadaṃ , na pacchimapadaṃ bhajanti .
Samohan ti vicikicchāsahagatañceva uddhaccasahagatañcāti duvidhaṃ .
Yasmā pana moho sabbākusalesu uppajjati , tasmā
P0.269 sesānipi idha vaṭṭanti eva .Imasmiṃ yeva hi duke dvādasākusalacittāni pariyādiṇṇānīti .
Vītamohan ti lokiyakusalābyākataṃ .
Saṃkhittan ti thinamiddhānupatitaṃ .
Etañhi saṅkuṭitacittaṃ nāma .
Vikkhittan ti uddhaccasahagataṃ .
Etañhi pasaṭacittaṃ nāma .
Mahaggatan ti rūpāvacaraṃ arūpāvacarañca .
Amahaggatan ti kāmāvacaraṃ .
Sauttaran ti kāmāvacaraṃ .
Anuttaran ti rūpāvacarañca arūpāvacarañca .
Tatrāpi sauttaraṃ rūpāvacaraṃ , anuttaraṃ arūpāvacarameva .
Samāhitan ti yassa appanāsamādhi upacārasamādhi vā atthi .
Asamāhitan ti ubhayasamādhivirahitaṃ .
Vimuttan ti tadaṅgavikkhambhanavimuttīhi vinimuttaṃ .
Avimuttan ti ubhayavimuttirahitaṃ ;
samucchedapaṭippassaddhinissaraṇavimuttīnaṃ pana idha okāsova natthi .
Sarāgamassa cittan ti sarāgaṃ assa cittaṃ .
Sesaṃ heṭṭhā vuttanayattā uttānatthameva .
Imasmimpi pabbe suddhavipassanāva kathitāti .
Cittānupassanāniddesavaṇṇanā niṭṭhitā .