Īkārantanapuṃsakarāsi
Īkārante ‘ ekavacanayosvaghonan ’ ti suttena simhi rasso , daṇḍi kulaṃ , daṇḍīni kulāni , yonaṃ lope daṇḍī .
‘ Ge vā ’ ti rasso , he daṇḍi , he daṇḍī vā , he daṇḍīni , he daṇḍī , daṇḍiṃ , daṇḍinaṃ , daṇḍīni , daṇḍī , daṇḍinā , daṇḍīhi , daṇḍībhi .
Pulliṅgasamaṃ .
Samāsepi sīghayāyi cittaṃ , sīghayāyīni , sīghayāyī , he sīghayāyi , he sīghayāyī vā , he sīghayāyīni , he sīghayāyī , sīghayāyiṃ , sīghayāyinaṃ , sīghayāyīni iccādi .
Evaṃ sukhakāri dānaṃ , cakkī , pakkhī , sukhī , sikhī iccādayo kulasambandhino ca veditabbā .
Iti īkārantanapuṃsakarāsi .