Anīyapaccayarāsi
‘ Bhāvakammesu tabbānīyā ’ ti anīyo , anubhuyyatīti anubhavanīyo .
Ākārantesu parassaralopo , kvaci yāgamo , upaṭṭhānīyo , dānīyo , padahatīti padhānīyo-yogāvacaro , pātabbanti pānīyaṃ , sāyituṃ arahatīti sāyanīyaṃ , paṭisāyanīyaṃ , pahānīyaṃ , abhitthavanīyaṃ , sotabbanti savanīyaṃ , hutabbanti
M0.523 havanīyaṃ , upāsanīyo , abhikkamitabboti abhikkamanīyo , rañjetīti rajjanīyo , gantabboti gamanīyo , vuccatīti vacanīyo .Kara , tara , thara , dhara , sara , hara .
771. Rā nassa ṇo [ ka .549; rū .550; nī .1135].
Rakārantadhātumhā parassa paccayanakārassa ṇo hoti .
Kattabbanti karaṇīyaṃ , taritabbanti taraṇīyaṃ , attharitabbanti attharaṇīyaṃ , dhāretabbanti dhāraṇīyaṃ , sāretabbanti sāraṇīyaṃ , haritabbanti haraṇīyaṃ iccādi .
Rundhitabbanti rundhanīyaṃ , bhuñjitabbanti bhuñjanīyaṃ , bhojanīyaṃ , paribhojanīyaṃ , yojetabbanti yojanīyaṃ , dibbitabbanti dibbanīyaṃ , bujjhitabbanti bujjhanīyaṃ , pāpuṇitabbanti pāpanīyaṃ , ñāpetabbanti ñāpanīyaṃ , cintetabbanti cintanīyaṃ , vajjetabbanti vajjanīyaṃ , titikkhitabbanti titikkhanīyaṃ , vīmaṃsitabbanti vīmaṃsanīyaṃ iccādi .
Iti anīyapaccayarāsi .